ԱԺ-ն այսօրվա նիստում քննարկում էր «Իմ քայլի» պատգամավորներ Սիսակ Գաբրիելյանի եւ Հակոբ Սիմիդյանի հեղինակած՝ «Մաքսային կարգավորման մասին» օրենքում փոփոխությունների օրինագիծը երկրորդ ընթերցմամբ եւ ամբողջությամբ ընդունելու մասին հարցը:
Հիշեցնենք, որ օրինագիծը վերաբերվում է արտերկրում գտնվող հայրենակիցներին:
«Համավարակի ընթացքում էլ տեսանք, որ տարիներ առաջ ինչ-ինչ պատճառներով արտագաղթածները ցանկանում են վերադառնալ»,-նշեց Սիսակ Գաբրիելյանը՝ հիշեցնելով, որ ըստ այս օրինագծի՝ հայրենադարձվողները կարող են իրենց հետ բերել մինչեւ 5000 եվրո արժողությամբ իրերը:
Իրավակարգավորումը կգործի կորոնավիրուսի տարածմամբ պայմանավորված սահմանահատման արգելքների վերացումից հետո: «Համաճարակը ցույց տվեց, որ յուրաքանչյուրի համար ամենաապահով երկիրը ՀՀ-ն է: Այն արատավոր երեւույթները, որոնց պատճառով տեղի ունեցան 2018թ.-ի փոփոխությունները, ՀՀ-ում, միանշանակ, իսպառ բացակայում են՝ բիզնեսի մեջ փայ մտնելը, մարդկանց ահաբեկելը: Սրանք վերացած են, ՀՀ-ն գրկաբաց սպասում է իր քաղաքացիներին»,-համոզմունք հայտնեց Սիսակ Գաբրիելյանը:
Կարդացեք նաև
ՀՀ պետական եկամուտների կոմիտեի փոխնախագահ Շուշանիկ Ներսիսյանն իր հերթին տեղեկացրեց, որ կառավարության եզրակացությունն այս օրինագծի վերաբերյալ դրական է. «Փաստեմ, որ շատ քաղաքացիներ են սպասում այս օրինագծին, որ կարողանան ՀՀ գալ: Մաքսային պահեստում արդեն ապրանքներ ունենք, դիմումներին էլ պատասխանում ենք, որ սպասեն օրենքի ընդունմանը»:
Հավելենք, որ խորհրդարանը միաձայն ընդունեց օրինագիծը:
Լուիզա ՍՈՒՔԻԱՍՅԱՆ
Լուսանկարը՝ Սիսակ Գաբրիելյանի ֆեյսբուքյան էջից
