Այսօր 2016 թվականի ապրիլին ծավալված ռազմական գործողությունների հանգամանքներն ուսումնասիրող քննիչ հանձնաժողովի նիստն էր: Ինչպես տեղեկացրել ենք, որ քննիչ հանձնաժողովի նիստին մասնակցում էր երրորդ նախագահ Սերժ Սարգսյանը:
Նիստից հետո հանձնաժողովի անդամ, իմքայլական Արմեն Խաչատրյանը հարցին՝ բավարարեցի՞ն Սերժ Սարգսյանի պատասխանները՝ պատասխանեց. «Որոշ պատասխաններ սպառիչ էին, որոշները՝ ոչ, հետո այլ հարցերի միջոցով ավելի սպառիչ են դառնում: Դեռեւս մարդիկ կան, նրանց էլ պետք է լսել, գործընթացը շարունակվում է: Երբ բոլորին լսենք, վերջնական գնահատականը կլինի»:
Լրագրողները հետաքրքրվեցին, թե հանձնաժողովում պատասխաններ տրվե՞լ են այն մասին, որ ապրիլյան պատերազմի ժամանակ վառելիք չի եղել, դավադրություններ են եղել, Արմեն Խաչատրյանը պատասխանեց. «Ես ապրիլյան հանձնաժողովի քննության արդյունքների մասին դեռեւս չեմ հայտնի, որոշ ժամանակ անց կամփոփվի, ամփոփելուց հետո բոլորին պարզ կլինի, թե որ կասկածներն են փարատվել, որոնք՝ ոչ, եթե պետական գաղտնիք չպարունակի»: Նա նաեւ ասաց, որ ցանկացած տվյալ նախ պետք է ստուգվի մի քանի ձեւ:
Հռիփսիմե ՋԵԲԵՋՅԱՆ
