«Բակո Սահակյանն ինքն է ցանկություն հայտնել օր առաջ մասնակցել քննիչ հանձնաժողովի աշխատանքներին: Բացի Բակո Սահակյանից, Արցախում էլի կան պաշտոնյաներ, որոնք ցանկություն են հայտնել մասնակցել»,-այսօր լրագրողների հետ զրույցում ասաց 2016 թվականի ապրիլին ծավալված ռազմական գործողությունների հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:
Ինչպես տեղեկացրել ենք, այսօր հանձնաժողովի նիստին հրավիրված էր ՀՀ երրորդ նախագահ Սերժ Սարգսյանը:
Անդրանիկ Քոչարյանն ասաց, որ Սերժ Սարգսյանի մասնակցությունը ԱԺ քննիչ հանձնաժողովի նիստին խոսում է այն մասին, որ Հայաստանը պառլամենտական երկիր է, որն ունի լեգիտիմ իշխանություն. «Անկախ ցանկություններից, պետք է հաշվի նստել այդ իրողության հետ եւ Սերժ Սարգսյանն իր մասնակցությամբ հաշվի նստեց Հայաստանում տեղի ունեցած փոփոխությունների հետ: Կարեւորելով ապրիլյան քննիչ հանձնաժողովի աշխատանքները՝ յուրաքանչյուր պաշտոնյա, որովհետեւ կան այնտեղ մարդկային կյանքեր, կան հարցականներ,անկախ կորոնավիրուսի զբաղեցրած դիրքից մեր կյանքում՝ այս խնդիրը պետք է լուծենք:
Անդրանիկ Քոչարյանն ասաց, որ ՍԵրժ Սարգսյանը խոստացել է լինել առավելագույնս անկեղծ. «Անկեղծության գնահատականը ո՞նց է որոշվում՝ մեր ձեռքի տակ եղած փաստերի եւ Սերժ Սարգսյանի՝ մեզ տրամադրած տեղեկատվության համադրման արդյունքում: Ամեն ինչ չի, որ հիշում է, տարիներ են անցել: Սերժ Սարգսյանը տասը տարի եղել է ՀՀ նախագահի պաշտոնում, դրանից առաջ եղել է ուժային կառույցների ղեկավար, վերջին հաշվով նա տիրապետում է այն ամենին, ինչը մեզ հետաքրքրում էր: Հիմա ինչքանով էր անկեղծ պարզ կլինի ինչքանով մեր ձեռքի տակ եղած փաստացի նյութը կհամընկնի Սերժ Սարգսյանի տրամադրած տեղեկատվության հետ»:
Կարդացեք նաև
Հարցին՝ նոր բացահայտումների հանգեցրե՞ց Սերժ Սարգսյանի այսօրվա գալը եւ հարցերին պատասխանելը՝ Անդրանիկ Քոչարյանը պատասխանեց, որ ինչ-որ չափով այո. «Սերժ Սարգսյանը բավականին պատրաստված էր եւ ինքը մինչեւ մեր աշխատանքի սկսվելը ներածական խոսքով հանդես եկավ, որը կկցվի եզրակացությանը»:
Դա եղել է վերլուծություն, որը կարեւորել է Սերժ Սարգսյանը:
Հռիփսիմե ՋԵԲԵՋՅԱՆ
