«Սկզբնական շրջանում քանի որ հիվանդությունը անհայտ էր, հիվանդության մասին տվյալներ չկային, ցանկացած մասնագետ պարտավոր էր բոլոր հնարավոր պաշտպանական եւ կանխարգելիչ միջոցները ձեռնարկել, ինչը մենք Հայաստանում չտեսանք: Մարդիկ անպատասխանատու հայտարարություններ էին անում, որից հետո այդ անպատասխանատու հայտարարությունները մերժում են եւ հայտարարում, թե որեւէ խնդիր չունեն այդ անպատասխանատու հայտարարությունները մերժելու մեջ: Դա պատիվ չի բերում»,-այսօր «Հայելի» ակումբում մամուլի ասուլիսում հայտարարեց «Մեկ առողջություն կոալիցիայի» առաջնորդ Գրիգոր Գրիգորյանը եւ շարունակեց. «Այն բոլոր հարցերը, որ այսօր ծագում են մեր ազգաբնակչության մեջ, մասնավորապես, որ այդ վիրուսը չկա եւ դա սուտ է՝ ոչ, դա սուտ չէ, վիրուսը կա: Այլ բան է, թե ինչպես են այդ վիրուսի ազդեցությունը ներկայացնում մեր հանրությանը: Այսօր արդեն իսկ կան տվյալներ, թե որ բջիջներն է ախտահարում այդ վիրուսը: Վիրուսը հիմնականում ախտահարում է իմունային համակարգի հակամարմինների ձեւավորման համար պատասխանատու բջիջները: Դրանք լիմֆոցիտներն են: Կան տարբեր տեսակի լիմֆոցիտներ, որոնք պատասխանատու են հակամարմինների ձեւավորման համար:
Ի՞նչ մենք ունենք այսօր: Մենք ունենք բազմաթիվ տվյալներ այն մասին, որ հիվանդների գերակշիռ մեծամասնությունը, եթե ոչ գրեթե բոլորը՝ ունեն մեկ կամ ավելի ուղեկցող քրոնիկ եւ մեկից ավելի այլ ինֆեկցիոն հիվանդություն: Ես խոսում եմ միջազգային եւ ազգային մակարդակով վարակվածների եւ մահացածների մասին պաշտոնական հրապարակումների մասին: Այսինքն, այն պնդումները, որ այսօր փաթաթում են ժողովուրդներին եւ երկրներին, թե կորոնավիրուսը առաջացնում է մահեր, հիմնավոր չեն: Դեռեւս չկան հստակ տվյալներ, որ այդ մահերը պայմանավորված են եղել կորոնավիրուսով: Կորոնավիրուսը կարող է երկրորդական, խթանիչի դեր խաղալ, որ այլ ինֆեկցիաները անեն իրենց սեւ գործը»:
Աշոտ ՀԱԿՈԲՅԱՆ
