Ինչպես տեղեկացրել էինք, երկու օր առաջ Գյումրու Հայուհու հրապարակում դանակահարել էին ծառայություն իրականացնող երկու երիտասարդ ոստիկանների՝ 1995 թվականին ծնված Ա. Բ-ին և 1989 թվականին ծնված Ա. Հ.-ին։ Նրանցից մեկը ճանապարհային ոստիկանության աշխատակից է, մյուսը՝ ոստիկանության «Կումայրի» բաժնի։
Մեկի մոտ ախտորոշվել էր կրծքավանդակի կտրած-ծակած վերք, մյուսի մոտ՝ ձախ ազդրի կտրած-ծակած վերք:
Գյումրի բժշկական կենտրոնի փոխտնօրեն Արմեն Խաչատրյանն Aravot.am-ին տեղեկացրեց, որ համապատասխան բուժօգնություն ստանալուց հետո ոստիկանները հենց հաջորդ օրը դուրս են գրվել հիվանդանոցից։
Հիշեցնենք, որ հանցագործություն կատարելու կասկածանքով ձերբակալվել է Կառնուտ գյուղի բնակիչ Լ․ Գալստյանը, իսկ նրա եղբայրը՝ Ա․ Գալստյանը ստորագրությամբ բաց է թողնվել։
Կարդացեք նաև
Ինչպես մանրամասնել են ՀՀ քննչական կոմիտեի տեղեկատվության և հասարակայնության հետ կապերի բաժնից․ «Ժամը 14:30-ի սահմաններում, «Միցուբիշի» մակնիշի ավտոմեքենայի վարորդի և ուղևորի անվտանգության գոտիներն ամրակապված չլինելու հանգամանքով պայմանավորված, իրավախախտումն արձանագրելու նպատակով, ոստիկանի կողմից կանգնեցվել է հիշյալ ավտոմեքենան: Ոստիկաններն օրենքով սահմանված կարգով վարորդին պարզաբանել են, որ նա երթևեկել է առանց ամրագոտիներն ամրակապելու՝ պահանջելով ներկայացնել վարորդական իրավունքի վկայականը, ավտոմեքենայի հաշվառման վկայագիրը՝ վարչական իրավախախտման արձանագրություն կազմելու համար: Ի պատասխան՝ նշված ավտոմեքենայի ուղևորը սկսել է հայհոյել ոստիկաններին, դուրս է եկել ավտոմեքենայից և ձեռքին եղած դանակով հարվածներ հասցրել ոստիկանության երկու ծառայողներին, ապա սկսել է դանակը թափահարել ներկա մյուս ոստիկանների ուղղությամբ՝ առերևույթ նրանց նկատմամբ գործադրելով բռնություն, որից հետո վարորդի հետ փորձել են փախուստի դիմել դեպքի վայրից, սակայն բերման են ենթարկվել Ոստիկանության բաժին, որոնցից մեկը ձերբակալվել:
Դեպքի առթիվ ՀՀ քննչական կոմիտեի Շիրակի մարզային քննչական վարչությունում ՀՀ քրեական օրենսգրքի 316-րդ հոդվածի (իշխանության ներկայացուցչի նկատմամբ բռնություն գործադրելը) 2-րդ մասով հարուցվել է քրեական գործ»:
Նունե ԱՐԵՎՇԱՏՅԱՆ
