Ադրբեջանի իշխանությունները չարաշահում են կորոնավիրուսի դեմ պայքարի շրջանակներում սահմանված սահմանափակումները և ձերբակալում են ընդդիմության ակտիվիստների, որպեսզի լռեցնեն կառավարությանը քննադատող ձայները: Այս մասին ասվում է Human Rights Watch իրավապաշտպան կազմակերպության հայտարարության մեջ:
Վերջին շաբաթներին Ադրբեջանում 10-30 օրով ձերբակալվել է վեց ակտիվիստ և ընդդիմադիր մեկ լրագրող կարանտինը խախտելու, ոստիկանությանը չենթարկվելու կեղծ մեղադրանքներով: «Այս ձերբակալությունները ամբողջությամբ համապատասխանում են Ադրբեջանում քաղաքական վրեժխնդրության վաղեմի մոդելին: Իշխանությունները պետք է դադարեցնեն արտակարգ իրավիճակն օգտագործել որպես պատրվակ՝ խոսքի ազատությունը սահմանափակելու համար»,-ասվում է կազմակերպության հայտարարության մեջ:
HRW-ում կարծում են, որ Ադրբեջանում կորոնավիրուսի դեմ պայքարի շրջանակներում ձեռնարկված միջոցառումները չափից դուրս սահմանափակում են տեղաշարժը և ազատությունը: Իրավապաշտպան կազմակերպությունն Ադրբեջանի իշխանություններին կոչ են անում անհապաղ դադարեցնել քաղաքականացված սահմանափակումները և ազատ արձակել ձերբակալվածներին:
Պատրաստեց՝ Վիկտորյա ԱՆԴՐԵԱՍՅԱՆԸ
