«Դուք ասացիք, որ 90-ականներին խոսակցություն կար ԿԲ գործառույթներն ընդլայնելու մասին: Նման խոսակցություններ այսօր էլ կան առավելապես տեսաբանների շրջանում: Որոշ երկրներ գնում են այդ ուղղությամբ՝ ընդլայնելով ԿԲ մանդատը, տալով գործառույթներ, որոնք միտված են նպաստելու երկրի տնտեսական զարգացմանը: Ձեր դիրքորոշումն ինչպիսի՞ն է»,-ԱԺ այսօրվա նիստում կենտրոնական բանկի նախագահի թեկնածուին նման հարցադրում հղեց ԱԺ նախագահ Արարատ Միրզոյանը:
ԱԺ-ն այսօր քննարկում է ՀՀ կենտրոնական բանկի նախագահի պաշտոնում «Իմ քայլը» խմբակցության կողմից ներկայացված Մարտին Գալստյանի թեկնածությունը:
«Կարծում եմ՝ մեր երկրի ներկայիս իրավիճակում ԿԲ մանդատը ճիշտ է ընտրված: Այդ մանդատը վերաբերում է գների կայունությանը եւ ֆինանսական համակարգի կայունությանը: Դրանք լրացնում են իրար եւ իրար հետ բախման մեջ են, ուստի կա կոորդինացիայի խնդիր»,-նախ նշեց Մարտին Գալստյանը:
Ինչ վերաբերում է տնտեսական աճին, նա նշեց. «Ապացուցված է, որ ԿԲ-ի կողմից կայուն մակրոմիջավայրի ստեղծումն ինքնին նպաստում է տնտեսական աճին, որովհետեւ դա ապահովում է կանխատեսելիության միջավայր, որում ներդրողները կցանկանան ներդրում անել: Բայց դա մանդատում ամրագրելը, իմ կարծիքով, դեռ վաղ է»:
Կարդացեք նաև
Լուիզա ՍՈՒՔԻԱՍՅԱՆ
