Aravot.am-ի տեղեկություններով, կորոնավիրուսով վարակման նոր դեպքեր են գրանցվել Անի խոշորացված համայնքի կենտրոնում՝ Մարալիկում։
Ըստ տեղեկությունների, 20 հանձնված թեստերից 9-ի պատասխանը եղել է դրական, վարակվածները Մարալիկի հիվանդանոցի բուժանձնակազմից են։ Հիվանդների թվում է նաև հիվանդանոցի տնօրենը, որը մասնագիտությամբ վարակաբան է։
Մենք այս տեղեկությունը փորձեցինք ճշտել Անի խոշորացված համայնքի ղեկավար Արտակ Գևորգյանից, որն ասաց, որ իր ունեցած նախնական տեղեկություններով, 9 հոգու մոտ թեստի պատասխանը դրական է տվել ու խոսքը բուժաշխատողների մասին է։
«Ես մտահոգ եմ, անհանգստացած, բուժաշխատողների շփման շրջանակը մեծ է, աշխատանքի ռիսկայնության աստիճանն էլ մեծ, հիվանդանոց դիմում են վատառողջ մարդիկ։ Կա մտահոգություն շրջանակը բացահայտելու ու հնարավորինս տարածումը կանխելու ուղղությամբ», -ասաց համայնքապետը։
Կարդացեք նաև
Հիշեցնենք, որ ապրիլի 6-ին կորոնավիրուսով վարակվել էր 68-ամյա մի տղամարդ Մարալիկից, որը մահացել էր։ Նրան երկկողմանի թոքաբորբով Մարալիկի հիվանդանոցից տեղափոխել էին Գյումրի բժշկական կենտրոն, նրան զննել էին նաև Գյումրու ինֆեկցիոն հիվանդանոցում։
Գյումրի բժշկական կենտրոնում էլ ապահով լինելով, որ վարակակիր չէ, ընդունել էին։ Իսկ երբ տեղափոխել էին մայրաքաղաք՝ «Սուրբ Գրիգոր Լուսավորիչ» հիվանդանոց, թեստավորել էին ու պարզվել էր վարակված է կորոնավիրուսով։ Նրա հետ շփված Գյումրի բժշկական կենտրոնի թվով 29 աշխատակիցներ մեկուսացած են, նրանք կթեստավորվեն 14-րդ օրը։
Շիրակի մարզպետ Տիգրան Պետրոսյանի պարզաբանումը՝ քիչ անց:
Նունե ԱՐԵՎՇԱՏՅԱՆ
