«ՀՀ պետական պարգեւների եւ պատվավոր կոչումների մասին» օրենքում կառավարությունն առաջարկում է լրացում կատարել ու ամրագրել՝ ծնողական փառքի մեդալով պարգեւատրված անձանց տալ ամենամսյա պատվովճար, որի չափը սահմանում է կառավարությունը:
Կառավարությունը սահմանել է, որ «Ծնողական փառքի» մեդալ ունեցողներին ամսական 40 հազար դրամ է տալու:
«Իմ քայլի» պատգամավոր Սոֆյա Հովսեփյանն իր ելույթում ասաց, որ այդ մեդալի արժանացածների ընտանիքի աջակցության հարցով դիմել է աշխատանքի եւ սոցիալական հարցերի նախարարություն ու ամեն անգամ տարբեր պատճառաբանություններով մերժել են: Նա նաեւ վստահեցրեց, որ Հայաստանում այդ մեդալ ունեցողների թիվն այդպես էլ մնալու է 9-ը, քանի որ նշված չափանիշներին չեն համապատասխանելու. «Մի խստացրեք այնպես, որ հետագայում գոնե մի քանի ընտանիքներ նույնպես արժանանան այս մեդալին, բազմազավակ ընտանիքները նույնպես կարողանան մեդալ ստանալ»:
Կարդացեք նաև
Հովսեփյանը դժգոհեց, որ նախագծում նշել են, թե բազմազավակ ընտանիքի երեխան պետք է գնա բանակ, լավ վարք դրսեւորի եւ այլն, բայց բազմաթիվ բազմազավակ ընտանիքներ կան, որոնք դեռ բանակի տարիքի երեխա չունեն. «Նույն Բեժանյանների ընտանիքի մասին է խոսքը, 12 երեխա ունեն, չկարողանան դիմել, մինչեւ մի օր երեխան բանակում փառքի՞ արժանանա: Այնպիսի կարգեր ասացիք, որ այս օրենքն ընդունելու էլ կարիք չեն ունենա»:
Փոխնախարար Արման Ուդումյանը պատասխանեց, որ ընտանիքի գնահատման դեպքում այդ չափորոշիչը պարտադիր չէ, կարգի հաստատման ժամանակ չափորոշիչների հարցը կարող են քննարկել մանրամասն:
Հռիփսիմե ՋԵԲԵՋՅԱՆ
