Ապրիլի 14-ին Ազգային ժողովի փոխնախագահ Ալեն Սիմոնյանը իր գրառման մեջ նշել է, որ ՀՀ հազարավոր քաղաքացիներ պահանջում են Ամենայն Հայոց Կաթողիկոսի փոփոխությունը, գուցե ակնարկելով, որ արտակարգ դրության ավարտից հետո, Ազգային ժողովը կարող է նույնիսկ ինչ-որ գործընթաց նախաձեռնել այդ հարցով։
Այս կապակցությամբ, պարոն Սիմոնյանին ցանկանում եմ հիշեցնել հետևյալը՝
ա) Համաձայն ՀՀ Սահմանադրության Հոդված 17-ի
1.Հայաստանի Հանրապետությունում երաշխավորվում է կրոնական կազմակերպությունների գործունեության ազատությունը:
Կարդացեք նաև
2.Կրոնական կազմակերպություններն անջատ են պետությունից:
Լինելով բարձրաստիճան պետական պաշտոնյա, պարոն Սիմոնյանը պետք է հարգի Սահմանադրությունը և երաշխավորի Հայաստանյայց Առաքելական սուրբ եկեղեցու գործունեության ազատությունը, և իր հայտարարություններով չփորձի միջամտել նրա գործունեությանը։
բ) Համաձայն ՀՀ Սահմանադրության Հոդված 18-ի
Հայաստանի Հանրապետությունը ճանաչում է Հայաստանյայց առաքելական սուրբ եկեղեցու՝ որպես ազգային եկեղեցու բացառիկ առաքելությունը հայ ժողովրդի հոգևոր կյանքում, նրա ազգային մշակույթի զարգացման և ազգային ինքնության պահպանման գործում:
Լինելով բարձրաստիճան պետական պաշտոնյա, պարոն Սիմոնյանը պետք է ևս մեկ անգամ հարգի Սահմանադրությունը և ճանաչի Հայաստանյայց Առաքելական սուրբ եկեղեցու բացառիկ առաքելությունը մեր ժողովրդի հոգևոր կյանքում, և չփորձի նսեմացնել այն՝ եկեղեցու վեհափառ հայրապետին ուղղված արհամարհական արտահայտություններով։
Որպես հայ քրիստոնյա, լրացուցիչ իմ կողմից նշեմ, որ եկեղեցին ոչ միայն նրա հովիվներն են, այլևս ինձ պես բազմաթիվ հավատավոր մարդիկ, և եկեղեցուց դուրս որևէ մեկը իրավունք չպետք է վերապահի իրեն մեր անունից խոսել, կամ էլ մեզ ցուցումներ տալ։
Իրականացրեք Սահմանադրությամբ ձեզ վերապահված լիազորությունները, և մի փորձեք դուրս գալ դրանց շրջանակներից, դուք դրա հետևանքները կարծես լավ չեք գիտակցում։
Ավետիք ՉԱԼԱԲՅԱՆ
«Ազգային օրակարգ» կուսակցության համահիմնադիր
