Արցախի մարդու իրավունքների պաշտպան Արտակ Բեգլարյանը ապրիլի 15-ին լրագրողների հետ հանդիպման ընթացքում անդրադարձավ Արցախում արտակարգ իրավիճակին։
«Այս պահին պետությունը պոզիտիվ պարտավորություն ունի առավելագույնը անելու բնակչության առողջությունը պաշտպանելու տեսանկյունից։ Դրա համար պետությունը ունի լիազորություններ, իրավասություններ՝ նաև սահմանափակելու որոշ իրավունքներ և ազատություններ։ Բայց այդ սահմանափակումները պարտադիր կերպով պետք է լինեն համաչափ։ Այսինքն՝ պետք է լինեն պիտանի և անհրաժեշտ սահմանադրությամբ սահմանված նպատակին հասնելու համար։ Դա նշանակում է, որ ավելորդ՝ ոչ նպատակային, ոչ անհրաժեշտ սահմանափակումներ պետությունը չպետք է կիրառի։ Սակայն, մյուս կողմից էլ՝ քաղաքացիները առավելագույնս պետք է զգույշ լինեն, իրենք էլ իրենց նախաձեռնությամբ պաշտպանեն և իրենց իրավունքները, և իրենց շրջապատի»,- ասաց նա։
Արտակ Բեգլարյանը հավելեց, որ ՄԻՊ գրասենյակը հետևում է արտակարգ իրավիճակի ընթացքին. «Եթե որևէ խնդիր արձանագրվում է կամ հրապարակային, կամ մեզ զանգելու միջոցով, մենք արձագանքում ենք։ Արդեն մի քանի դեպքով, իմ միջամտությամբ, քաղաքացիների իրավունքները պաշտպանվել են»։
https://www.facebook.com/ArtsakhOmbuds/videos/2781337428780195
Կարդացեք նաև
Ամի ՉԻՉԱԿՅԱՆ
