Երեկ Արցախում կայացած նախագահական ընտրությունների երկրորդ փուլի նախնական արդյունքներով` Արցախի նախագահ է ընտրվել նախկին վարչապետ Արայիկ Հարությունյանը:
Հիշեցնենք, երեկ Արցախում նախագահական ընտրությունների երկրորդ փուլն անցկացվում էր արտակարգ իրավիճակի պայմաններում: Նախագահական ընտրությունների երկրորդ փուլում, հիշեցնենք, մրցում էին նախկին վարչապետ Արայիկ Հարությունյանը եւ գործող արտգործնախարար Մասիս Մայիլյանը: Մարտի 31-ին կայացած ընտրությունների առաջին փուլում Արայիկ Հարությունյանը հավաքեց ձայների 49,2 տոկոսը, իսկ Մասիս Մայիլյանը՝ 26,4 տոկոսը: Առաջին փուլից հետո Մասիս Մայիլյանը հանդես եկավ՝ ընտրողներին հորդորելով չմասնակցել երկրորդ փուլի քվեարկությանը: Երեկ Մասիս Մայիլյանն ինքն էլ չէր մասնակցում քվեարկությանը:
Քիչ առաջ լրագրողների հետ հանդիպման ժամանակ Արցախի ԿԸՀ նախագահ Սրբուհի Արզումանյանն անփոփեց ընտրությունների նախնական արդյունքները: Ըստ այդմ` Արայիկ Հարությունյանը ստացել է 39860 ձայն (84,5 տոկոս), իսկ Մասիս Մայիլյանը՝ 5728 ձայն (12.1 տոկոս):
Տարածքային ընտրական հանձնաժողովներից ստացված տվյալների համաձայն՝ ընտրություններին մասնակցել է 47165 ընտրող (ընտրողների 45 տոկոսը):
Կարդացեք նաև
Անվավեր քվեաթերթիկների թիվը 1876 է կամ 4 տոկոս:
Ստեփանակերտում Արայիկ Հարությունյանը ստացել է 11051 ձայն, Մասիս Մայիլյանը`1168:
Սրբուհի Արզումանյանը նաեւ տեղեկացրեց, որ Արցախում կորոնավիրուսի համավարակի օջախներից Միրիկ համայնքում քվեարկությանը մասնակցել է 12 մարդ կամ ընտրողների 9,9 տոկոսը: Համաճարակի մյուս օջախում` Մոշաթաղ համայնքում, քվեարկությանը մասնակցել է 59 ընտրող կամ ընտրողների 32 տոկոսը:
Սրբուհի Արզումանյանը սա բավական ցածր ցուցանիշ է համարում` նախկինում կայացած ընտրություններում մասնակցության ցուցանիշի համեմատությամբ:
ԿԸՀ նախագահը նաեւ ասաց, որ տեղեկություն չունի, թե Միրիկի բնակիչը, որը կորոնավիրուսով վարակակիր է, հասցրե՞լ է քվեարկել նախքան հիվանդանոց տեղափոխվելը, թե՞ ոչ:
Նելլի ԳՐԻԳՈՐՅԱՆ
Լուսանկարը՝ Արայիկ Հարությունյանի ֆեյսբուքյան էջից
