Ամերիկացի սենատոր Ռոբերտ Մենենդեզը նամակ է ուղարկել Միացյալ Նահանգների Սենատի հատկացումների հանձնաժողովի անդամներ Լինդսի Գրահամին և Պատրիկ Լեհին` կոչ անելով մարդասիրական ծրագրերի շրջանակում Արցախին հատկացնել առնվազն 1.5 միլիոն ԱՄՆ դոլար և վերականգնել ականազերծման ծրագրի ֆինանսավորումը: Ինչպես հաղորդում է ԱՄՆ Հայ դատի հանձնախումբը, Մենենդեզն ընդգծել է, որ Արցախին հատկացվող մարդասիրական աջակցության ծրագիրը թիրախավորվել է Դոնալդ Թրամփի վարչակազմի կողմից, չնայած նրան, որ վերջինս մեծացրել է Բաքվին ցուցաբերվող օգնությունը պաշտպանության և անվտանգության ոլորտներում:
Սենատորը նաև կոչ է արել ֆինանսավորել Լեռնային Ղարաբաղում գործող վերականգնողական կենտրոնները, որոնցից օգտվում են ականազերծման հետևանքով վնասվածքներ ստացած, ինչպես նաև ֆիզիկական այլ խնդիրներ ունեցող անձինք: Նշվում է, որ սենատորներ Ջեք Ռիդը և Ռիչարդ Բլյումենթալը միացել են Մենենդեզի նախաձեռնությանը:
ԱՄՆ Հայ դատի հանձնախմբի գործադիր Արամ Համփարյանն իր հերթին շնորհակալություն է հայտնել Մենենդեզին սկզբունքային դիրքորոշման համար:
Հիշեցնենք, որ ԱՄՆ վարչակազմը դադարեցրել է Արցախի Հանրապետությունում ականազերծման ծրագրի ֆինանսավորումը:
Պատրաստեց՝ Վիկտորյա ԱՆԴՐԵԱՍՅԱՆԸ
