«Միջազգային հանցագործությունների, մասնավորապես՝ ցեղասպանության պարագայում մենք ունենք համապատասխան օրենսդրական բաց: Մեզանում քրեական օրենսդրությունը չի նախատեսում ցեղասպանության հրապարակային կոչերի դատապարտում, մինչդեռ ցեղասպանության մասին կոնվենցիան սահմանում է՝ ցեղասպանության ուղղակի եւ հրապարակային կոչը եւս պատժելի է»,-ԱԺ նիստում այսօր հայտարարեց «Իմ քայլը» խմբակցության պատգամավոր, ԱԺ պետաիրավական հարցերի հանձնաժողովի նախագահ Վլադիմիր Վարդանյանը:
Հիշեցնենք, որ խորհրդարանը քննարկում է բռնության կոչը եւ բռնության կոչի արդարացումը քրեականացնող օրինագիծը երկրորդ ընթերցմամբ եւ ամբողջությամբ ընդունելու հարցը:
«Նշյալ հանցակազմի առումով մենք քրեական օրենսդրությունում բաց ունենք: Թեեւ չեմ բացառում, որ ցեղասպանության հանցակազմի առնչությամբ էլ հնարավոր լինի հարցը քննարկել եւ լուծում տալ, բայց առաջիկայում ինքս հանդես կգամ օրենսդրական նախաձեռնությամբ եւ կառաջարկեմ, որ քրեականացվեն ցեղասպանության ուղղակի եւ հրապարակային կոչերը»,-հայտարարեց Վլադիմիր Վարդանյանը:
Լուիզա ՍՈՒՔԻԱՍՅԱՆ
