Կառավարության հեղինակած՝ բռնության կոչը եւ բռնության կոչն արդարացնելը քրեականացնող օրինագիծն այսօր երկրորդ ընթերցմամբ ԱԺ օրակարգում է:
Ինչպես տեղեկացրեց արդարադատության փոխնախարար Սրբուհի Գալյանը, մինչեւ երկրորդ ընթերցումը ԲՀԿ-ն առաջարկել էր բռնության կոչն արդարացնելը քրեականացնելու դրույթը բացառել: Նախարարությունը չի ընդունել առաջարկը, որովհետեւ, ըստ Սրբուհի Գալյանի, բռնության կոչն արդարացնելն ունի նույն վտանգավորությունը, ինչ բուն բռնության կոչը. «Այսինքն, եթե անձն արդարացնում է արդեն իսկ կատարված բռնության կոչը, եւ արդարացումը պայմանավորված է անձանց՝ սահմանադրությամբ պաշտպանված սոցիալական հատկանիշներով, դա ոչ պակաս հանրային վտանգավորության դեպք է»:
Փոխնախարարի խոսքով. «Եթե ԲՀԿ-ի առաջարկն ընդունելի լիներ, կարող էր պատահել մի իրավիճակ, երբ տասը անձ որեւէ բռնության կոչ այնպես արդարացնեին, որ դա կունենար անդառնալի հետեւանքներ: Միաժամանակ, ԲՀԿ-ի մտահոգությունը փարատելու նպատակով սահմանել ենք՝ գիտության, արվեստի եւ մշակույթի գործերում բռնության կոչերի նմանվող արտահայտությունների եւ նյութերի տարածումը բռնության արդարացում չի կարող համարվել եւ չի կարող տեղավորվել օրինագծի հանցակազմի համատեքստում»:
Կարդացեք նաև
Լուիզա ՍՈՒՔԻԱՍՅԱՆ
