«Իրականում, լուրջ ընտրություններ չեն սրանք: Երեւի սա է մեր գնահատականը: Ընտրություն, որպես այդպիսին, կարելի է ասել` չկա: Ընդամենն այդ ծիսակարգն է, որը պետք է անեն եւ անում են»,- Aravot.am-ի հետ զրույցում ասաց «Ականատես» դիտորդական առաքելության համակարգողներից, Թրանսփարենսի Ինթերնեշնլ հակակոռուպցիոն կենտրոնի գործադիր տնօրեն Սոնա Այվազյանն` անդրադառնալով վաղը Արցախի հանրապետությունում կայանալիք նախագահական ընտրությունների երկրորդ փուլին:
Ապրիլի 9-12-ը նախատեսված էր ընտրությունների երկրորդ փուլի քարոզարշավը: Թեկնածուներից Մասիս Մայիլյանն, ըստ էության` հրաժարվել էր ընտրապայքարի երկրորդ փուլից, իսկ Արայիկ Հարությունյանը, կորոնավիրուսի համաճարակով պայմանավորված` նույնպես ակտիվ քարոզարշավ չի իրականացրել: 
«Քարոզարշավը`քարոզարշավ չէր, մրցակցություն չկա, այդ պատճառով լայնամասշտաբ դիտարկումներ չենք իրականացրել, մանավանդ, որ երկու կողմերն էլ, ըստ էության հայտարարել էին`քարոզչություն չեն իրականացնելու»,- ասաց Սոնա Այվազյանը` հավելելով. «Միայն երեկվա բանավեճն է եղել, որը ինքնաբանավեճ էր կամ չգիտեմ, թե ի՞նչ կարելի է դա կոչել: Ըստ էության, քարոզարշավ չի եղել, որ մենք կարողանանք գնահատել` մրցակցային է, օրե՞նք են խախտել, թե ի՞նչ է եղել»:
Սոնա Այվազյանը միայն մեկ արձանագրում է անում. «Բարեգործությունը շարունակվում է»: Նա մանրամասնեց, որ երեկ Արցախ մեկնելու ճանապարհին տեսել են, թե ինչպես են Հայաստան-Արցախ անցակետում նախագահի թեկնածու Արայիկ Հարությունյանի շտաբի ներկայացուցիչները անցակետում բժիշկներին տրամադրում կորոնավիրուսից պաշտպանիչ միջոցներ: «Ինչը որ հաստատ իրենց գործը չէ»,- եզրակացրեց մեր զրուցակիցը:
Արցախի նախագահական ընտրությունների երկրորդ փուլի դիտարկում չեն իրականացրել նաեւ «Իրազեկ քաղաքացիների միավորում» ՀԿ-ն եւ «Իրավական կրթություն եւ վերահսկողություն» ՀԿ-ն:
Կարդացեք նաև
Հիշեցնենք, որ ապրիլի 12-ից Արցախի հանրապետությունում, նախագահ Բակո Սահակյանի հրամանագրով, արտակարգ իրավիճակ է հայտարարվել, սակայն նախագահական ընտրության երկրորդ փուլի քվեարկությունն ամսիր 14-ին կայանալու է:
Նելլի ԳՐԻԳՈՐՅԱՆ
