Թուրքիայի ԱԳՆ-ն դիմել է Չինաստանի դեսպանին և Չինաստանի արտգործնախարարությանը՝ պահանջելով մեկնաբանել Հայաստան ուղարկված հումանիտար օգնության տուփերի վրա գրված տողերը, հաղորդում է Anadolu գործակալությունը:
Հիշեցնենք, որ ապրիլի 8-ին Չինաստանից Հայաստան ուղարկված մարդասիրական օգնության փաթեթների վրա գրված է եղել՝ «Թող մեր բարեկամությունն ավելի բարձր լինի, քան Արարատ լեռը, և ավելի երկար, քան Յանցզի գետը»: Գրառումը մեծ աղմուկ էր բարձրացրել Թուրքիայում:
Թուրքիայի ԱԳՆ-ն դեսպան Դենգ Լիից պահանջել է հստակեցնել Չինաստանի դիրքորոշումը և մեկնաբանել նման գրառման պատճառը: Ըստ թուրքական գերատեսչության՝ դեսպանն ասել է, որ Հայաստան ուղարկված մարդասիրական օգնությունը պատրաստվել է Չինաստանի շրջաններից մեկի տեղի իշխանությունների կողմից և ուղարկվել մասնավոր ընկերության միջոցով: «Ընդ որում, ի սկզբանե տուփերի վրա միայն չինարեն գրառում է եղել, Արարատ լեռան մասին հիշատակում չի եղել, անգլերեն գրառումը հետո է ավելացվել»,-մեջբերում է գործակալությունը Թուրքիայի ԱԳ նախարարության խոսնակ Համի Աքսոյի հայտարարությունը:
Դեսպանը նաև նշել է, որ Չինաստանը հարցի առնչությամբ քննություն է իրականացնում, որի արդյունքների մասին թուրքական կողմը կտեղեկացվի:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
