ԱԺ արտահերթ նիստում այսօր քննարկվում էր «Դեղերի մասին օրենքում» փոփոխությունների օրինագիծն առաջին ընթերցմամբ ընդունելու հարցը: Ինչպես նշեց ՀՀ առողջապահության փոխնախարար Անահիտ Ավանեսյանը՝ դեղերի առեւտրով զբաղվողների լիցենզավորումը հիմա հնարավոր չէ՝ պայմանավորված կորոնավիրուսի տարածմամբ, ուստի օրինագծով հնարավորություն կընձեռվի լիցենզավորման ժամանակահատվածը երկարաձգելու. լիցենզավորման պարտադիր պահանջն ուժի մեջ կմտնի ոչ թե ապրիլի 15-ին, այլ օգոստոսի 15-ից:
«Իմ քայլի» պատգամավոր Նարեկ Զեյնալյանն էլ հստակեցրեց, որ խոսքը դեղերի մեծածախ առեւտրով զբաղվող կազմակերպությունների մասին է. «Նրանց երեք ամիս ժամանակ էր տրված՝ լիցենզավորվելու համար, եւ այս օրինագծով կառավարությունը լրացուցիչ ժամկետ է տալիս, որպեսզի լիցենզավորվեն եւ կարողանան զբաղվել դեղերի մեծածախ առեւտրով»:
Կարդացեք նաև
ԲՀԿ պատգամավոր Արման Աբովյանն էլ հայտարարեց. «Օրինագիծը բացահայտեց կարեւոր բան: Խոսքը փաստաթղթերի մասին է, որոնք արտակարգ դրության իրավիճակում քաղաքացիները հնարավորություն չունեն ժամկետը երկարաձգել: Կա տեղեկություն, որ արտասահմանում եւ ՀՀ-ում շատ մարդիկ այդ խնդրին առնչվում են: Լուծման ամենակարճ տարբերակը իշխանության կողմից հատուկ որոշումներ ընդունելն է, պետք է մեխանիզմներ գտնել»:
Հավելենք, որ օրինագծի երկրորդ ընթերցումը պետք է կազմակերպվի 24 ժամվա ընթացքում:
Լուիզա ՍՈՒՔԻԱՍՅԱՆ
