Նոր կորոնավիրուսի տարածման վտանգի հետ կապված երեկ Թուրքիայի իշխանությունները երկու օրով՝ ապրիլի 11-ից ժամը 00.00-ից մինչեւ 13-ի 00.00 ժամը արտակարգ խիստ դրություն են հայտարարել երկրի 31 մեծ քաղաքներում (Անկարա,Անտալիա, Ստամբուլ, Ադանա, Իզմիր, Տրապիզոն եւ այլն)։
Մինչեւ այդ էլի գործում էին սահմանափակումներ, ասենք՝ դուրս չգան փողոցներ 65 տարեկանից բարձր տարիքի մարդիկ ու մինչեւ 20 տարեկանները, խանութների մի մասն ու շուկաները չէին աշխատում։ «Արտակարգ խիստ դրություն մտցնելու մասին հայտարարեցին ընդամենը երկու ժամ առաջ։ Երեկոյան ժամը 10-ին ասացին, որ 00.00 ժամից խիստ ռեժիմը գործում է։ Պատկերացրեք՝ ինչ էր կատարվում խանութներում՝ հրմշտոց, ծեծկռտուք»,-մեզ հետ զրույցում նշեց Ստամբուլում ապրող Նարինե Մանուկյանը՝ ավելացնելով, որ մի քանի անգամ հայտարարեցին, որ մարդկանց արգելվելու է փողոց դուրս գալ։ Միայն մեկ ժամ հետո, երեւի տեսնելով մարդկանց անհանգստությունը, ասեցին, որ հացի փռերը, փոքր խանութներն ու դեղատներն աշխատելու են։
«Երեւի մարդկանց թվաց, որ երկու օր դուրս չեն գալու, դրա համար փորձեցին երկու ժամվա մեջ սնունդ գնել»,-ասաց Նարինեն։
Կարդացեք նաև
Վերջինս ապրում է Ստամբուլի Ֆատի թաղամասում, որը կենտրոն է համարվում ու միշտ ցանկացած ժամի մարդաշատ է լինում։ Ստամբուլի քաղաքապետարանն էլ է այս թաղամասում տեղակայված։ Չնայած փողոց դուրս գալու արգելքին՝ Նարինեն համարձակվեց իջնել փողոց՝ տեսանյութ ու լուսանկարներ անել։
«Հացի փռերն են բաց, դեղատները։ Թաղամասային փոքր խանութներն էլ են փակ։ Միայն հաց ու դեղ կարաս առնես»,- ասաց Նարինեն՝ նշելով, որ ուղղակի զբոսանքի դուրս եկածներին ոստիկանությունը տուգանում է 370 դոլար։
Նրա խոսքով՝ ամեն քայլափոխի ոստիկաններ են ու թաղամասից դուրս գալ չես կարող։«Միանգամից մոտենում են ու տուգանում»,-ասաց նա՝ բոլորին առողջություն մաղթելով:
«Մենք էլ հագուստեղենի փոքրիկ խանութ ունենք, բայց մի քանի օր է՝ չենք աշխատում: Պետք է խնայենք բոլորիս առողջությունը»,-ասաց Նարինեն։
Դավիթ ԱՐՄԵՆՅԱՆ
