Հայաստանում կորոնավիրուսի տարածման կանխումն ապահովելու նպատակով հայտարարված արտակարգ դրության ժամկետը մեկ ամսով կերկարաձգվի, զուգահեռ՝ տնտեսական գործունեության որոշ տեսակների համար կթույլատրվի աշխատանքը՝ անվտանգության կանոնների խիստ պահպանմամբ: Այս մասին «ֆեյսբուքյան» ուղիղ միացմամբ այսօր հայտարարեց ՀՀ վարչապետ Նիկոլ Փաշինյանը՝ հիշեցնելով, որ արտակարգ դրության գործող ժամկետը լրանալու է երեքշաբթի:
«Անխուսափելի է դա: Երկուշաբթի կամ երեքշաբթի կառավարության նիստ կլինի, այնուհետեւ՝ ԱԺ նիստ: Երկարաձգումն անհրաժեշտ է վարակի տարածումը կանխելու համար: Պետք է ունենանք հիվանդացության հնարավորինս քիչ դեպքեր»,-նշեց Նիկոլ Փաշինյանը: Նրա խոսքով՝ արտակարգ դրության արդեն իսկ անցած ժամանակահատվածի համար խնդիրը լուծված է, քանի որ հիմա հիվանդացության օրական թիվը 30-ի շրջանակում է. «Դա գոհացուցիչ է»:
https://www.facebook.com/nikol.pashinyan/videos/1436842246487424/
Ինչ վերաբերում է տնտեսական գործունեության որոշ տեսակների աշխատանքի ապահովմանը, Նիկոլ Փաշինյանը նշեց, որ երկուշաբթի օրվանից որոշ տնտեսվարողների համար գործունեությունը կլինի ամբողջությամբ թույլատրված. «Երկուշաբթիից ամբողջությամբ թույլատրված կլինեն՝ գյուղատնտեսություն, անտառտնտեսություն, ձկնորսություն, ձկնաբուծություն, հանքարդյունաբերություն, գազ, էլեկտրականություն, ջրամատակարարում, թափոնների մշակում, փոխադրում/պահեստային տնտեսություն, ֆինանսական/ապահովագրական գործունեություն, պարտադիր սոցիալական ապահովություն, սոցիալական սպասարկում, օտարերկրյա կազմակերպությունների գործունեություն: Իսկ ապրիլի տասներեքից ամբողջությամբ կթույլատրենք բացօթյա շինարարական գործունեությունը, ծխախոտի արտադրությունը, իսկ ապրիլի քսանից հետո՝ հագուստի արտադրությունը, տնտեսական խանութների գործունեությունը, գիտական հետազոտությունները»:
Կարդացեք նաև
Վարչապետը նաեւ հայտնեց, որ տեղաշարժի սահմանափակումները պահպանվելու են, տանից պետք է դուրս գալ միայն խիստ անհրաժեշտության դեպքում:
Լուիզա ՍՈՒՔԻԱՍՅԱՆ
