Տարբեր երկրներում կորոնավիրուսի համավարակի ժամանակ հայտարարված համընդհանուր ինքնամեկուսացման պահանջները տարբեր են: Որոշ երկրներում անգամ առողջարարական վազքն է արգելված՝ անգամ եթե մարդը ոչ ոքի հետ շփում չի ունենում:
Հայաստանում, թեկուզ կարճ ժամանակով, մաքուր օդում առողջարարական վազքով զբաղվել կամ հեծանիվ վարել թույլատրվում է: Բելգիայում եւ Նիդերլանդներում գիտնականներն ուսումնասիրել եւ հաշվարկել են, որ նաեւ զբոսնելը, վազելը եւ հեծանիվ վարելը անվտանգ կարող են լինել որոշակի պայմաններ պահպանելու դեպքում:
Նրանք պարզել են, որ առաջարկվող 1-2 մետր ստանդարտ սոցիալական հեռավորությունը արդյունավետ է միայն ծածկած տարածքներում, իսկ դրսում՝ թույլ քամու պայմաններում:
Բացօթյա տարածքում վազելու ժամանակ մարդը շնչում է, հազում, փռշտում՝ օդում թողնելով մանրէների ամպ, եւ նրա հետեւից վազողը անցնում է այդ ամպի միջով: Նկար 2-ում կարմիր կետերը մեծ մանրէներն են, որոնք վարակելու ավելի մեծ հավանականություն ունեն, սակայն արագ են գետնին նստում: Մարդը կարող է անցնել այդ ամպի միջով եւ վարակը կարող է նստել նրա հագուստի վրա:
Կարդացեք նաև
Նկար 2
Գիտնականների արած մոդելավորումը ցույց է տվել, որ այս դեպքում ստանդարտ սոցիալական հեռավորությունը գործում է կողք-կողքի վազող երկու մարդու դեպքում, այն էլ՝ թեթեւ քամու պայմաններում: Կտրականապես խորհուրդ չի տրվում ուղիղ գծով միմյանց հետեւից քայլել, վազել կամ հեծանիվ վարել: Անկյունագծով քայլելու կամ վազելու դեպքում նույնպես վարակ ձեռք բերելու հավանականությունը նվազում է:
Անհրաժեշտ է.
-Զբոսնելիս դիմացինից պահպանել առնվազն 4-5 մետր սոցիալական հեռավորություն:
-Վազելիս կամ դանդաղ հեծանիվ վարելիս միմյանցից պահպանել առնվազն 10 մետր սոցիալական հեռավորություն:
-Արագ հեծանիվ վարելիս՝ միմյանցից պահպանել առնվազն 20 մետր սոցիալական հեռավորություն:
Աշոտ ՀԱԿՈԲՅԱՆ
