Մեքսիկան ԱՄՆ-ի և ՕՊԵԿ+-ի երկրների հետ համաձայնեցրել է նավթի արդյունահանումը սահմանափակելու հարցը: Այս մասին հայտարարել է Մեքսիկայի նախագահ Անդրես Մանուել Լոպես Օբրադորը: Նրա խոսքով` ՕՊԵԿ+-ի երկրները Մեքսիկային առաջարկել էին նավթի արդյունահանումն օրական նվազեցնել սկզբում 400 հազար, ապա 350 հազար բարելով: Բայց Մեքսիկայի իշխանությունները պնդել են, որ պետք է օրական արդյունահանումը նվազեցնել 100 հազար բարելով, քանի որ հետո երկրի համար դժվար կլինի վերականգնել արդյունահանումը:
Օբրադորը հայտարարել է, որ արդյունքում որոշվել է, որ Մեքսիկան օրական արդյունահանումը կկրճատի 100 հազար բարելով, իսկ օրական 250 հազար բարելով կրճատման պատասխանատվություն կստանձնի Միացյալ Նահանգները: Օբրադորը հայտարարել է, որ պայմանավորվել է ԱՄՆ նախագահ Դոնալդ Թրամփի հետ:
Միևնույն ժամանակ ՕՊԵԿ+-ի երկրները Bloomberg գործակալությանը հայտնել են, որ տեղյակ չեն գործարքից, որի մասին հայտնել է Մեքսիկայի նախագահը:
ՌԴ նախագահի մամուլի քարտուղար Դմիտրի Պեսկովն էլ նշել է, որ Մեքսիկայի դիրքորոշման փոփոխությունից հետո Կրեմլը ՕՊԵԿ+–ի գործարքը փաստացի կայացած է համարում:
Կարդացեք նաև
Նշենք, որ ապրիլի 9-ին ՕՊԵԿ+-ի երկրները պայմանավորվել են սահմանափակել նավթի արդյունահանումը 2020 թվականի մայիս-հունիս ամիսներին օրական ընդհանուր 10 միլիոն բարելով, այնուհետև մինչև տարեվերջ՝ 8 միլիոն բարելով։ Առաջարկին աջակցել էին բոլոր երկրները, բացառությամբ Մեքսիկայի:
Պատրաստեց՝ Վիկտորյա ԱՆԴՐԵԱՍՅԱՆԸ
