Վերջին օրերին կորոնավիրուսի հաստատված դեպքերը հարաբերականորեն պակասել են, եւ դա արտակարգ դրության, հատկապես վերջին երկու շաբաթվա ավելի խիստ ռեժիմի հետեւանք է:
Այսօր այս մասին ասուլիսին ասաց առողջապահության նախարար Արսեն Թորոսյանը: Բայց դեպքերի քիչ լինելը չի նշանակում, որ պետք է հանգիստ լինենք, եւ ինչպես նախարարն ասաց, հիմա վարակը տարածման ավելի շատ աղբյուր ունի, ընդ որում, աշխարհագրորեն տարբեր. «Իրականում կորոնավիրուսի շրջանառությունը տեղ ունի ՀՀ-ում, եւ զգուշավորություն է պետք, փոխանցման շղթաները կոտրելը երկարատեւ է լինելու»:
Դրա պատճառներից մեկն, ըստ նախարարի, վարակի ինկուբացիոն երկար շրջանն է, այն բավական դանդաղ է դուրս գալիս օրգանիզմից, նույնիսկ այն դեպքում, երբ նշաններ չկան:
Թորոսյանն ասաց՝ հետեւություններ անելու համար դեռ վաղ է. «Զգոնությունը չպետք է կորցնենք, պետք է շարունակենք բոլոր գործողությունները, նույնիսկ ավելի լայն թափ տալով՝ պացիենտների հայտնաբերում, թեստավորում, բուժում, կոնտակտավորների մեկուսացում, մինչեւ կլինի հիվանդության ամբողջական բուժում կամ դրա դեմ պատվաստում»:
Կարդացեք նաև
Նախարարը գտնում է, որ պետք է շարունակել արտակարգ դրությունը, արդեն պարետատանն առաջարկել է երկարացնել ժամկետը, բայց որոշողը պարետն է:
Թորոսյանն ասաց, որ հիմա խնդիրը կառավարելի թվով հիվանդներ ունենալն է, որպեսզի առողջապահական համակարգը կարողանա սպասարկել հնարավորությունների չափով, աղետալի կլինի, երբ չկարողանան մեծ թվով հիվանդների բուժել:
Նելլի ԲԱԲԱՅԱՆ
