ԱԺ առողջապահության եւ սոցիալական հարցերի հանձնաժողովի այսօրվա նիստում քննարկվում է «Պետական կենսաթոշակների» եւ «Պետական նպաստների» մասին օրենքներում փոփոխությունների օրինագիծը, որով առաջարկվում է անցում կատարել կենսաթոշակների եւ նպաստների վճարման բացառապես անկանխիկ եղանակի, սակայն օրենքը բացառություններ է սահմանում, եթե, օրինակ, նպաստի կամ կենսաթոշակի շահառուն ունի առաջին կամ երկրորդ խմբի հաշմանդամություն, կամ լրացել է շահառուի 75 տարեկանը, կամ նպաստառուն մինչեւ 14 տարեկան երեխա է:
Աշխատանքի եւ սոցիալական հարցերի փոխնախարար Սմբատ Սաիյանի փոխանցմամբ՝ բացառություն են նաեւ լիազորագրով թոշակ կամ նպաստ ստանալու դեպքերը:
«Գործող օրենքով կենսաթոշակը նշանակվում է քաղաքացու նախընտրած ձեւով՝ կանխիկ կամ անկանխիկ: Վերջինս ավելի հարմարավետ տարբերակ է, ինչի մասին վկայում է այն փաստը, որ վերջին տարիներին ավելանում է անկանխիկ եղանակով կենսաթոշակ եւ նպաստ ստացողների թիվը»,-տեղեկացրեց Սմբատ Սաիյանը: Նրա փոխանցմամբ՝ մարտին, օրինակ, կենսաթոշակների 53%-ը տրվել է անկանխիկ եղանակով:
Փոխնախարարը նաեւ նշեց՝ այն քաղաքացիները, որոնք թվարկված բացառությունների շրջանակում են, համապատասխան դիմում կարող են ներկայացնել մինչեւ 2021թ. հունվարի 1-ը, այլապես այդ ժամկետից սկսած կիրառվելու է օրենքով սահմանված վճարման անկանխիկ եղանակը:
Կարդացեք նաև
Հավելենք, որ օրինագիծը դեռ պետք է քննարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
