«Հասկանալի է` որեւէ «անիրավաչափ դիտավորության» վերաբերյալ ենթադրությունները տրամաբանական չեն»,- Aravot.am-ի հարցին՝ ի՞նչն է պատճառը, որ Երևանի քաղաքապետարանի աշխատակազմի անշարժ գույքի կառավարման վարչության մասնագետ Նարեկ Թադևոսյանին չի փոխանցվել իր պարգևավճարը, ինչպես նա պնդում է, այսպես պատասխանեց քաղաքապետի մամուլի քարտուղար Հակոբ Կարապետյանը:
Նշենք, որ Երևանի քաղաքապետարանի աշխատակազմի անշարժ գույքի կառավարման վարչության մասնագետ, ՀՀԿ ԵԿ Երևանի խորհրդի նախագահ Նարեկ Թադևոսյանն իր ֆեյսբուքյան էջում գրել է. «Ավելի վաղ տեղեկացրել էի, որ եռամսյակային պարգևավճարս պետք է ամբողջությամբ փոխանցեմ համավարակի առաջնագծում պայքարող բժիշկներին և բուժհաստատություններին` կոչ անելով նաև գործընկերներիս միանալ իմ ինքնաբուխ նախաձեռնությանը…Ցավով պետք է հայտնեմ, որ կատարվեց այն, ինչը հավանաբար սպասելի էր: Քաղաքապետարանի ղեկավար կազմը որոշել է կանխել բարի կամքի այս դրսևորումս. աշխատակազմից առանձնացրել է իմ անունը և չի փոխանցել ինձ հասանելիք պարգևավճարի գումարը: Ի դեպ, իմ կարծիքով՝ այս դիտավորյալ քայլն արվել է, որպեսզի արհեստականորեն ստեղծվի բարենպաստ իրավիճակ` իմ օրինակին չհետևելու և հենց իրենց պարգևավճարներից չհրաժարվելու ու գումար չփոխանցելու համար»:
Հակոբ Կարապետյանը մեզ հետ զրույցում ասաց, որ Երևանի քաղաքապետարանի աշխատակազմի ստորաբաժանումների աշխատակիցների պարգեւավճարների ցուցակը կազմում է յուրաքանչյուր ստորաբաժանման ղեկավարը: Այնուհետև հորդորեց գրավոր հարցման միջոցով պարզել, նշված դեպքի հետ կապված մանրամասներ:
Մեր հարցին՝ քաղաքապետարանում կա՞ն աշխատակիցներ, որոնք իրենց պարգևավճարը որոշել են փոխանցել բժիշկներին և բուժհաստատություններին, Երևանի քաղաքապետի մամուլի քարտուղարն այսպես պատասխանեց. «Քաղաքապետարանի բոլոր աշխատակիցները իրենց մարտ ամսվա պարգեւավճարները զիջել են բուժաշխատողներին: Իսկ քաղաքապետ Հայկ Մարությանը, որը պարգեւավճար չի ստանում, շտապօգնությանն է փոխանցել մարտ ամսվա աշխատավարձն ամբողջությամբ՝ 429000 դրամ»:
Կարդացեք նաև
Տաթև ՀԱՐՈՒԹՅՈՒՆՅԱՆ
