Այսօր Աշխատանքի եւ սոցիալական հարցերի նախարար Զարուհի Բաթոյանից, էկոնոմիկայի նախարար Տիգրան Խաչատրյանից, փոխվարչապետ Մհեր Գրիգորյանից կառավարության մամուլի սրահում ասուլիսի ժամանակ լրագրողները հետաքրքրվեցին՝ ե՞րբ են վերջին անգամ նրանք պարգեւավճար ստացել:
Էկոնոմիկայի նախարարն ասաց, որ վերջին անգամ պարգեւավճար ստացել են փետրվարին: Ըստ նրա, մարտ ամսին ստացել են նախարարության միայն այն աշխատակիցները, որոնք սպասարկող անձնակազմում են եւ հանգստյան օրերին աշխատել են՝ շենքի մաքրության եւ սանիտարական վիճակը կարգի բերելու համար: Թե հաջորդ անգամ երբ կստանան, Տիգրան Խաչատրյանն ասաց, որ այդ հարցին չի պատասխանի. «Երբ իրավիճակը կկարգավորվի եւ կառավարությունը որոշում կկայացնի շարունակել աշխատակիցների համար պարգեւավճարների վճարման հարցը, հենց այդ ժամանակ էլ կստանանք: Մենք եւ մեր աշխատակիցները շատ լավ հասկանում ենք, որ դժվարությունները վերաբերում են բոլորին, եւ, բոլորը պետք է յուրաքանչյուր իրավիճակում ունենան համարժեք սպասումներ»:
Զարուհի Բաթոյանի խոսքով, պարգեւավճարը ստացել է փետրվարին. «Իսկ ապագայում երբ կստանամ, կստանա՞մ, թե՞ ոչ, չեմ կարող ասել, այստեղ միասնական որոշման խնդիր կա, որովհետեւ, մեզ պարգեւավճարների տրամադրումը մենք չենք որոշում: Երբ կլինի համապատասխան որոշում այդ ժամանակ այդ մասին կիրազեկենք»:
Մհեր Գրիգորյանն ասաց, որ չի կարող հստակ ասել, որովհետեւ չի հիշում. «Կարող է սխալվեմ, բայց պատրաստ եմ այդ հարցին գրավոր պատասխանել: Թե ինչ կլինի ապագայում կամ մոտ ապագայում, հանրությունը տեղեկացված կլինի»:
Կարդացեք նաև
Լուսինե ԲՈՒԴԱՂՅԱՆ
