Զբոսաշրջային ակտիվության վերականգնումը Հայաստանում հնարավոր է 2021 թվականի երկրորդ եռամսյակից միայն: Այս կարծիքին է Տուրիզմի հայկական ֆեդերացիայի նախագահ Մեխակ Ապրեսյանը: Այսօր «Սպուտնիկ Արմենիա» մուլտիմեդիա կենտրոնում կայացած տեսակոնֆերանսի ժամանակ, որին մասնակցում էին նաեւ փորձագետներ Բելառուսից, Մոլդովայից եւ Վրաստանից, Մեխակ Ապրեսյանն ասաց. «Եթե հաջողվի արագ հաղթահարել կորոնավիրուսի համաճարակը, ապա արդեն աշնանը հնարավոր կլինի որոշակի տեղաշարժեր արձանագրել, սակայն լիակատար զբոսաշրջային ակտիվությունը հնարավոր կլինի վերականգնել միայն եկող տարվա երկրորդ եռամսյակից»:
Փորձագետները հիմնականում կիսում են այս մոտեցումը`նկատելով, որ ստեղծված իրավիճակի հաղթահարումից հետո դեռ որոշակի ժամանակ է անհրաժեշտ լինելու ոլորտի լիակատար աշխուժացման համար`սկսած փոխադրումների իրականացման վերականգնումից մինչեւ հյուրանոցային ոլորտի խնդիրների կարգավորում:
Առավել լավատես է միայն Վրաստանի ներկայացուցիչ Վրաստանի էքսկուրսավարների ասոցիացիայի անդամ Եկատերինա Լամաձեն: Նրա կարծիքով, Վրաստանում արդեն ամռանը զբոսաշրջային ոլորտը կակտիվանա:
Մեխակ Ապրեսյան
Մեխակ Ապրեսյանի կարծիքով, համաճարակի նահանջից հետո, սակայն ինչպես աշխարհում, այնպես էլ Հայաստանում զբոսաշրջիկների կտրուկ աճ կլինի: Պատճառը պարզ է` մարդիկ հոգնել են տներում նստելուց եւ երբ սահմանները բացվեն եւ թույլատրվի ճամփորդել, զբոսաշրջիկները կակտիվանան:
Կարդացեք նաև
Սակայն ոլորտի վերակենդանացումն առանց պետական աջակցության Մեխակ Ապրեսյանը չի պատկերացնում: Նա զուգահեռներ անցկացրեց 2009 թվականին H1N1-ի վարակի տարածման շրջանում ստեղծված իրավիճակի հետ: Այն ժամանակ աշխարհում զբոսաշրջության ցուցանիշը նվազեց 4 տոկոսով, բայց երբ վարակը նահանջեց, արդեն 2009 թվականի չորրորդ կիսամյակում ոլորտում ակտիվություն նկատվեց: Իսկ 2010-ին միջազգային զբոսաշրջային ակտիվության ցուցանիշը 6,6 տոկոսով աճեց: Համեմատության համար, փորձագետը նկատում է, որ 2008-ին միջազգային զբոսաշրջային ակտիվությունը 2 տոկոս էր կազմել: Հայաստանի դեպքում H1N1-ի վարակի նահանջից հետո զբոսաշրջային ակտիվության ցուցանիշը 2010-ին եղել է 19 տոկոս`2009-ի 3 տոկոսի փոխարեն:
Հիշեցնենք, պաշտոնական հայտարարությունների համաձայն, կորոնավիրուսի համավարակի արդյունքում Հայաստանն արդեն 135 միլիոն դոլարի կորուստ է կրել:
Բելառուս փորձագետ, Հանրապետական զբոսաշրջային միության կառավարչության անդամ Ֆիլիպ Գուլիի կարծիքով, սակայն, հետկորոնավիրուսային զբոսաշրջությունն էականորեն կտարբերվի: Փորձագետի համոզմամբ, սկզբնական շրջանում, դեռ մի քանի տարի, մարդիկ առավել կգերադասեն ներքին զբոսաշրջությունը`առանց էկզոտիկ դրսեւորումների:
Նելլի ԳՐԻԳՈՐՅԱՆ
