Գեղարքունիքի մարզի Սոթք համայնքում երեկ՝ առավոտյան տեղի ունեցած 12 ամյա տղայի ինքնասպանության դեպքը հանելուկ է երեխայի ծնողների ու համագյուղացիների համար:
«Սաղիս համար էլ հանելուկ է մնում, թե ինչից կարող է լինել: Մի քանի տարբերակ ենք մտածում, մեկը կարող է պատահականություն լինել, որովհետեւ, թելը, որով կախվել է, օղակ չի սարքել, գցել վիզը, մտածում ենք, որ բարձր տեղ է կանգնել, որ վերեւից թելը կապի, որ խաղա կամ ինչ-որ բան կախի, ես ինչ իմանամ, այդտեղից ոտքը սահել է, ու թելը ընկել վիզը կամ երեւի երեխեքին փորձել է ինչ-որ բան ցույց տալ, զարմացնել: Մի բան կարող եմ ասել, որ այդ երեխայի ընտանիքը շատ նորմալ ընտանիք է, շատ կազմակերպված, ընտանիքի մթնոլորտը շատ լավ, երեխաները՝ դաստիարակված: Հայրը պայմանագրային զինծառայող է, իսկ մայրը զորամասի ճաշարանում է աշխատում»,- Aravot.am-ին ասաց Սոթք համայնքի ղեկավար Հակոբ Ավետյանը:
Ըստ նրա՝ մահացած երեխան եւս երկու եղբայր ունի, ընտանիքի ավագ որդին էր. «Երեխեքով խաղացել են, ասում են՝ փոքր եղբոր վրա է ջղայնացել, կապրոնի փոքր շիշ է շպրտել փոքրիկի վրա ու դուրս է եկել: Մի քիչ հետո երեխեքը կանչել են՝ Ավետիս, Ավետիս, հարեւանից էլ են հարցրել, թե կարող է իրենց տուն է գնացել: Հարեւանի կինն էլ տեսել է երեխեքին, ջղայնացել, թե հազար ձեւի հիվանդություն կա, ինչու եք դուրս եկել: Ինքն էլ է սկսել ձայն տալ Ավետիսին: Հետո գոմ են մտել, այնտեղ փնտրել ու տեսել են կատարվածը»:
12-ամյա տղան, ըստ գյուղապետի, լավ սովորող ու լավ վարքագիծ ունեցող երեխա է եղել:
Կարդացեք նաև
Դեպքի առթիվ ՀՀ քննչական կոմիտեի Գեղարքունիքի մարզային քննչական վարչության Վարդենիսի քննչական բաժնում հարուցվել է քրեական գործ՝ ՀՀ քրեական օրենսգրքի 110-րդ հոդվածի (ինքնասպանության հասցնելը) 1-ին մասով:
Նշանակվել են մի շարք փորձաքննություններ, կատարվում են քննչական և դատավարական այլ գործողություններ՝ դեպքի բոլոր հանգամանքները պարզելու ուղղությամբ:
Նախաքննությունը շարունակվում է:
Արփինե ՍԻՄՈՆՅԱՆ
