ՀՀԿ փոխնախագահ Արմեն Աշոտյանն իր «ֆեյսբուքյան» էջում այսօր ահազանգել է. «Քիչ առաջ ինձ է դիմել Իսրայելի միջազգային դպրոցներից մեկում սովորող հայ աշակերտների խումբ, որը ստեղծված իրավիճակում հայտնվել է ծանր կացության մեջ։ 9 երեխա ուզում է վերադառնալ Հայաստան, սակայն չի կարողանում։ Հիմա դպրոցն իրենց ընդունել է և խոստացել պահել այնքան ժամանակ մինչև չգտնվի ելք դուրս գալու երկրից։ Նրանց փորձել է օգնել Իսրայելում Հայաստանի արտակարգ և լիազոր դեսպան` Արմեն Սմբատյանը, սակայն խնդիրը լուծել չի հաջողվել։ Դիմում եմ լրատվամիջոցներին՝ խնդրի բարձրաձայնման եւ պատկան մարմինների առջեւ այն դնելու խնդրանքով: Միաժամանակ առաջարկում եմ Կառավարությանը չարտերային թռիչք կազմակերպել եւ վերադարձնել աշակերտներին Հայաստան։ Իմ հաշվարկով այդ emergency flight-ը կարժենա մոտ 30 000 $՝ այսինքն մոտ 20 պատգամավորական «պարգեւավճար»: Սփյուռքի հետ աշխատանքի պատասխանատուներին հորդորում եմ կապ հաստատել այդ աշակերտների հետ, իսկ մեր եկեղեցու Երուսաղեմի պատրիարքարանին՝ խնդրում աջակցել նրանց»:
Հարցի առնչությամբ ՀՀ ԱԳՆ խոսնակ Աննա Նաղդալյանն Aravot.am-ին տվեց հետեւյալ մեկնաբանությունը. «Դեռևս մարտի 23-ին Իսրայելում ՀՀ դեսպանության և ԱԳՆ-ի հետ կապ են հաստատել ՀՀ քաղաքացի 9 ուսանողներ, որոնք այդ ժամանակ դպրոցի փակման պատճառով ունեին կեցության և Հայաստան վերադառնալու խնդիրներ: Վերջիններս տեղում ապահովվել են կեցության համար անհրաժեշտ բոլոր պայմաններով, ինչպես նաև դեսպանության կողմից նրանց համար ձեռք էր բերվել դեպի Հայաստան ավիատոմս, ապահովվել տեղափոխումն օդանավակայան: Սակայն չվերթների չեղարկման և Իսրայելի կառավարության կողմից նոր տիպի կորոնավիրուսի դեմ պայքարի շրջանակներում կիրառվող սահմանափակումների պատճառով հետաձգվել է մեր քաղաքացիների` Հայաստան վերադարձի իրականացումը:
Դեսպանությունը մշտական կապի մեջ է ուսանողների հետ, և պարբերաբար քայլեր են ձեռնարկվում տեղում իրենց առջև ծառացող բոլոր խնդիրներին լուծումներ գտնելու ուղղությամբ: Ներկայումս արտերկրում գտնվող ՀՀ քաղաքացիների խնդիրները բավականին համապարփակ են. ՀՀ դիվանագիտական ներկայացուցչությունները, ԱԳՆ-ն և պարետատունն ամբողջովին տիրապետում են ավելի քան 50 երկրում գտնվող մեր քաղաքացիների խնդիրների մասին տեղեկատվությանը: Արտերկրում ՀՀ դիվանագիտական ներկայացուցչությունները շուրջօրյա և գերծանրաբեռնված ռեժիմով աշխատում են այդ խնդիրների հասցեագրած ուղղությամբ՝ տարբեր երկրների կողմից կիրառված և ամեն օր փոփոխվող սահմանափակումների պայմաններում:
Յուրաքանչյուր առանձին երկրի դեպքում աջակցության ձևը և ծավալը որոշվում է՝ հաշվի առնելով առողջապահական անվտանգության խնդիրները, առկա հնարավորությունները և կոնկրետ իրավիճակը: Բոլոր շահագրգիռ անձանց կոչ ենք անում չտրվել այս կամ այն առանձին դեպքի շուրջ աժիոտաժ ստեղծելու և այն հատվածական շահերին ծառայեցնելու գայթակղությանը: Իրավիճակը պահանջում է քաղաքացիական պատասխանատվություն և լուրջ վերաբերմունք բոլորի կողմից»:
Կարդացեք նաև
Հիշեցնենք, որ ապրիլի 2-ի դրությամբ Իսրայելում կորոնավիրուսով վարակվածների թիվը 6211 է, մահացել է 33 մարդ:
Լուիզա ՍՈՒՔԻԱՍՅԱՆ
