«Եթե չեմ սխալվում, ապրիլի 6-ն էր, երբ Անգելա Մերկելի հետ ասուլիսի ժամանակ ինձ հարց ուղղվեց, եւ ես ասացի, որ մեր զինվորները կռվում են 80-ականների զենքով: Գաղտնիք չէ, որ իմ շատ ասածներ մարդիկ փորձում էին շահարկել: Դա էլ դարձավ շահարկման առակա»,-«5-րդ ալիք» հեռուստաընկերության գլխավոր տնօրեն Հարություն Հարությունյանի հեղինակած՝ «Հաղթանակի ապրիլ» փաստավավերագրական ֆիլմում, որի պրեմիերան ապրիլի 2-ին էր, անդրադառնալով ապրիլյան ռազմական գործողություններին հաջորդած մեկնաբանություններին՝ ասում է ՀՀ երրորդ նախագահ Սերժ Սարգսյանը:
Նա նշում է. «Այդ մարդկանց հետաքրքիր չէր, թե ես ինչու եմ այդպես ասել, նրանց հետաքրքիր էր միայն շահարկելը: Իմ նպատակը շատ պարզ էր, ես դիմում էի միջազգային հանրությանը եւ ասում՝ չնայած նրան, որ դուք աչք եք փակել Ադրբեջանի՝ մինչեւ ատամները սպառազինվելու վրա, որ նրանք միլիարդներ են ծախսել, այդուհանդերձ, մեր զինվորների տոկունությունն ու մասնագիտական ունակությունները գերազանցում են հակառակորդին եւ մերոնք կատարեցին իրենց պարտականությունները: Իրականում նման մարդիկ չգիտեն, որ 80-ականների զենք՝ չի նշանակում հին զենք: Թող հարցնեն ցանկացած երկրի սպառազինության գիտակներին. նրանց զինանոցներում կա՞ն 80-ականների զենքեր, թե՞ ոչ»:
2016թ.-ի դրությամբ Արցախի ՊԲ հրամանատար Լեւոն Մնացականյան էլ հավելում է՝ ապրիլի առաջին օրերից հետո եղան նաեւ մանիպուլյացիաներ այն մասին, որ դիրքերում փամփուշտներ, վառելիք եւ սննդամթերք չի եղել. «Նման բան չի եղել: Էքստրեմալ վիճակը ենթադրում է նաեւ մատակարարումների խափանումներ, բայց չի կարելի ասել, թե չկա: Ասում են, թե տանկերում վառելիք չի եղել: Չկա նման բան, եթե եղել է, փաստ ներկայացրեք»:
2016թ.-ի դրությամբ ՀՀ ԶՈՒ ԳՇ պետ Յուրի Խաչատուրովն էլ հետեւյալ միջադեպն է պատմում. «6-րդ պաշտպանական շրջանի հրթիռահրետանային զորքերի հրամանատարին զեկուցում են, որ այսինչ դիրքում փամփուշտները վերջանում են, եւ նա զինվորի հետ մեքենայով անձամբ տանում է փամփուշտները: Ադրբեջանցի հատուկ ջոկատայինները, որոնք դեռեւս աշխատում էին խորքում, կտրում են նրա գլուխը… երբ օրեր շարունակ մարտական գործողություններ են ընթանում, ռազմամթերքը վերջանում է, պետք է մատակարարել»:
Կարդացեք նաև
Լուիզա ՍՈՒՔԻԱՍՅԱՆ
