Բիզնեսին աջակցության ծրագրերից օգտվելու համար Էկոնոմիկայի նախարարությունը 120 դիմում է ստացել, որի ընդհանուր արժեքը գումարայինով կազմում է 1,4 միլիարդ դրամը գերազանցող վարկային պահանջ: Այսօր այս մասին ասաց Էկոնոմիկայի նախարար Տիգրան Խաչատրյանը՝ կառավարության մամուլի սրահում կազմակերպված ասուլիսում:
Նախարարը եւս մեկ անգամ թվարկեց աջակցության ծրագրերը՝ նշելով, որ դրանց նպատակը արագ եղանակով ֆինանսական միջոցները հասանելի դարձնելն է այն կազմակերպություններին, որոնք առեւտրային բանկերի համար հանդիսանում են հուսալի գործընկեր: Ըստ նրա, առաջին միջոցառմամբ՝ առեւտրային բանկերն են որոշում, թե որ կազմակերպություններն են այն հուսալի վարկառուները, որոնք կարող են օգտվել կառավարության համաֆինանսավորմամբ, վերաֆինանսավորմամբ կամ տոկոսների սուբսիդավորման ծրագրերից:
Երկրորդ միջոցառումը վերաբերում է գյուղատնտեսության ոլորտում կառավարության կողմից իրականացվող աջակցությանը: Նախարարի տեղեկացմամբ, երրորդ ուղղությունը փոքր ու միջին բիզնեսի համար արագացված ընթացակարգով, առանց բանկային եւ ֆինանսական մյուս կազմակերպությունների միջնորդության վարկավորման հնարավորությունն է՝ եթե նրանք 2019 թվականի ընթացքում դրսեւորվել են որպես օրինապահ եւ պարտաճանաչ հարկ վճարողներ եւ վարկառուներ:
Աջակցության չորրորդ գործիքը օգնություն է այն կազմակերպություններին, որ չնայած դժվար ժամանակներին, 2020 թվականի մարտ ամսվա վերջի դրությամբ չեն կրճատել աշխատակիցների քանակը եւ չեն կրճատել այն աշխատավարձի ֆոնդը, որ, սովորաբար օգտագործում էին իրենց աշխատակիցների տվյալ ամսվա աշխատանքը հատուցելու համար. «Մենք հայտարարեցինք, որ այդ կազմակերպությունների դեպքում, յուրաքանչյուր հինգերորդ աշխատակցի մեկ միջին ամսվա աշխատավարձը վճարում է կառավարությունը»:
Կարդացեք նաև
Լուսինե ԲՈՒԴԱՂՅԱՆ
