Aravot.am-ն այսօր մի շարք քաղաքացիներից ահազանգեր ստացավ: Նրանք անհանգստացած են, թե ինչպե՞ս են «Սուրբ Գրիգոր Լուսավորիչ» ԲԿ-ում այսուհետ ստանալու հեմոդիալիզի ծառայություն, քանի որ ինչպես ՀՀ առողջապահության նախարար Արսեն Թորոսյանը հայտարարեց՝ այդ ԲԿ-ն ևս կպատրաստեն կորոնավիրուսով հիվանդներին սպասարկելու համար: Մեզ դիմած՝ հեմոդիալիզի ծառայությունից օգտվող հիվանդները կարծում են՝ եթե իրենք նույն հիվանդանոց հաճախեն, որտեղ կսպասարկեն նաև կորոնավիրուսով հիվանդներին, ապա իրենց առողջությունը վտանգված կլինի. մեծ կլինի կորոնավիրուսով վարակվելու ռիսկը:
Aravot.am-ն այս մտահոգությունը փոխանցեց ՀՀ առողջապահության նախարարի խոսնակ Ալինա Նիկողոսյանին: Հետաքրքրվեցինք՝ արդյոք հեմոդիալիզի ծառայությունը շարունակվելո՞ւ է մատուցվել «Սուրբ Գրիգոր Լուսավորիչ» ԲԿ-ում, ինչպես Aravot.am-ին դիմած քաղաքացիներն էին պնդում և եթե այո, ապա այդ քաղաքացիների առողջությանը վտանգ չի՞ սպառնում, նա պատասխանեց. «Հեմոդիալիզի ծառայությունը իրականացվելու է «Սուրբ Գրիգոր Լուսավորիչ» բժշկական կենտրոնի տարածքում, բայց ունենալու է առանձին մուտք, և նրա տարածքը լինելու է մեկուսացված: Այսինքն՝ վիրուսի ներթափանցումը բացառված է: Բժշկական կենտրոնի տարածքում շարունակելու են գործել նաև ծննդատունը և պոլիկլինիկան: Մնացած բոլոր ծառայությունները տեղափոխվելու են մայրաքաղաքի այլ բժշկական կենտրոններ»: Ալինա Նիկողոսյանը վստահեցրեց՝ ամեն ինչ հաշվի է առնված, բոլոր սցենարները հաշվարկված են:
Տաթև ՀԱՐՈՒԹՅՈՒՆՅԱՆ
