ՀՀ աշխատանքի եւ սոցիալական նախարար Զարուհի Բաթոյանից լրագրողներն այսօր հետաքրքրվեցին՝ ո՞վ պետք է փոխհատուցվի այն քաղաքացիների տրանսպորտային ծախսերը, ովքեր աշխատանքի կարող են գնալ, սակայն հանրային տրանսպորտ չլինելու պատճառով աշխատանքի են գնում տաքսիով: Նախարարը պատասխանեց. «Որեւէ որոշում չկա, աջակցության մեխանիզմ չունենք դեռ»:
Հարց հնչեց նաեւ հետեւյալի մասին՝ աջակցության ի՞նչ ծրագիր կա այն անձանց համար, որոնց երեխաները 14 տարեկանից բարձր են, բայց ծնողը միայնակ մայր չէ, ու ազատվել է աշխատանքից:
Զարուհի Բաթոյանը նշեց. «Կարծում եմ՝ այսօր ընդունված ծրագրի շրջանակում նաեւ նրանք կարող են տեղավորվել»:
Ինչ վերաբերում է չվճարվող արձակուրդում գտնվող, բայց աշխատանքից չհեռացված անձանց, նախարարն ասաց. «Դրա առնչությամբ եւս չկա որոշում: Մենք նաեւ առաջարկ ենք արել աշխատանքային օրենսգրքում փոփոխություն անելու, որը, կարծում եմ, այս խնդիրը կփակի: Բայց կառավարությունն առաջարկը պետք է ուղարկի ԱԺ, եւ այս պահին չենք կարող ասել, թե ինչ փոփոխություն կունենանք: Համենայն դեպս, առաջարկում ենք փաստացի կատարված աշխատանքի համար վճարել»:
Կարդացեք նաև
Հիշեցնենք, որ կորոնավիրուսի տարածման պատճառով ստեղծված իրավիճակից ելնելով՝ կառավարությունն այսօր սոցիալական աջակցության նոր որոշում է ընդունել:
Լուիզա ՍՈՒՔԻԱՍՅԱՆ
