«Աջակցության եւ մինչեւ օրս հայտարարված մյուս ծրագրերից որեւէ մեկի համար դիմում գրելու, նախարարություն կամ սոցիալական ծառայության գրասենյակ այցելելու անհրաժեշտություն չկա, որովհետեւ ոչ բոլոր ծրագրերի կարգերն են նախապատրաստվել»,-լրագրողների հետ հանդիպմանն այսօր անդրադառնալով կառավարության սոցիալական աջակցության ծրագրերից օգտվելու կարգին՝ ասաց ՀՀ աշխատանքի եւ սոցիալական հարցերի նախարար Զարուհի Բաթոյանը:
«Կարգերը պատրաստ լինելուն պես ծրագրերը քաղաքացիներին հասանելի կլինեն առցանց տարբերակով: Աջակցություն ստացող քաղաքացիների ցանկը կհրապարակվի մեր կայքում: Եթե քաղաքացին համապատասխանում է երկու ծրագրի, ապա կարող է ընտրել միայն մեկը»,-հայտնեց նախարարը:
Զարուհի Բաթոյանը նաեւ տեղեկացրեց՝ կորոնավիրուսի տարածման վտանգով պայմանավորված՝ կարիք չկա «Հայփոստ»-ի գրասենյակ այցելել որեւէ տեսակի սոցիալական ծառայություն ստանալու համար. սոցիալական ծառայության ներկայացուցիչներն իրենք են այցելում քաղաքացիներին:
Բացի այդ, նախարարի խոսքով, բանկի միջոցով որեւէ տեսակի սոցիալական ծառայություն ստացողները պետք է այցելեն բանկ՝ պարտադիր պահպանելով անվտանգության կանոնները: Զուգահեռ, հ/կ-ների հետ համատեղ նախարարությունն իրականացնում է միայնակ տարեցների խնամքին միտված գործողություններ:
Կարդացեք նաև
Լուիզա ՍՈՒՔԻԱՍՅԱՆ
