Այսօր կառավարությունը որոշեց կանխավճար հատկացնել բանակին նոր կարգով սնունդ պատրաստելու եւ տրամադրելու ծառայություն մատուցող ընկերություններին՝ մեկ զինվորի հաշվով մեկ օրվա համար հատկացնելով 3000 դրամ: Վարչապետ Նիկոլ Փաշինյանն ասաց. «Այն զորամասերում, որտեղ այդ համակարգը ներդրված է, սննդի որակի էական անգամներով փոփոխություն ունենք: Բայց ես ուզում եմ ասել, որ երբ սկզբնական շրջանում այս նախագծի ներդրման նպատակահարմարությունն էինք քննարկում, բոլորս գիտեինք, որ մտնում ենք մութ անտառ, որտեղ շատ պարամետրեր ի սկզբանե հայտնի, կանխատեսելի չեն»:
Վարչապետի խոսքով, ծնողը տղային բանակ ուղարկելուց հետո չպետք է ստիպված լինի հոգ տանել, որ որակյալ սնունդ ուղարկի նրան: Նիկոլ Փաշինյանն ասաց, որ վերջին ամսվա ընթացքում չորս քննարկում են ունեցել, որոնց նպատակը մեկն է՝ զինվորին ապահովել հնարավորինս բարձրորակ սննդով. «Եվ, քանի որ ընկերություններն այս ընթացքում ներդրումներ են արել եւ դրանք չեն փոխհատուցվել, ոչ մի կոպեկ փող չենք տվել, բայց կան նրբություններ, որ պետք է պարզաբանվեն. մենք քննարկումների արդյունքում որոշեցինք, որ որոշակի կանխավճար տրվի արդեն իսկ սեփական միջոցների հաշվին կատարված ներդրումների որոշակի մասի համար»:
Պաշտպանության նախարար Դավիթ Տոնոյանը նշեց, որ կորոնավիրուսային իրավիճակը ծանր պայմաններ է ստեղծել բանակին սնունդ մատակարարող 5-6 այդպիսի կազմակերպության գործունեության համար:
Կարդացեք նաև
Լուսինե ԲՈՒԴԱՂՅԱՆ
