2019 թվականի բյուջեի եկամուտները, առաջին եռամսյակի տվյալներով, գերակատարվել են 8,9 միլիարդ դրամի չափով, իսկ այս տարվա առաջին եռամսյակի ցուցանիշները գերազանցում են 49,5 միլիարդ դրամով կամ 16,5 տոկոսով: Կառավարության այսօրվա նիստում այս մասին ասաց վարչապետ Նիկոլ Փաշինյանը: 2018 թվականի նույն ժամանակահատվածի համեմատությամբ, այս ցուցանիշներն, ըստ Փաշինյանի, ավելի են 60, 5 միլիարդ դրամով:
«Մենք ճգնաժամի եզրին բավականին լուրջ կատարումներ ենք ունեցել եւ 2018 թվականի համեմատությամբ, 2020 թվականին եկամուտներն ավելացրել ենք ավելի քան 100 միլիարդ դրամով: Բոլորս ցավով գիտակցում ենք, որ կորոնավիրուսի պատճառով առաջացած ճգնաժամի հետեւանքով դեռ անորոշություններ շատ կան, ակնհայտ է, որ մենք այս տեմպերը կկորցնենք, բայց 2019 եւ 2020 թվականի տնտեսական տեմպերը վկայում են այն փաստը, որ կառավարության տնտեսական քաղաքականությունն արդյունավետ է եւ մենք տիրապետում ենք տնտեսության զարկերակին: Իհարկե, ստեղծվել են նոր պայմաններ, նոր իրավիճակ եւ ճգնաժամային իրավիճակում մենք պետք է նույնքան արդյունավետ կարողանանք տնտեսական որոշումներ կայացնել»:
Փաշինյանի խոսքով, այս ճգնաժամը ոչ թե պետք է առիթ դառնա, որ մենք հարկային կարգապահությունը նվազեցնենք, այլ, ընդհակառակը, ճգնաժամի պայմաններում, առավել եւս, պետք է հարկային կարգապահությունը խստանա. «Այն շրջիկ խոսակցությունը, որ մարդիկ չեն աշխատում, դուք հարկեր եք պահանջում, ուզում եմ ընդգծել, որ հարկերը գոյանում են աշխատանքի, դրամաշրջանառության, եկամուտների, շահույթների առկայության պարագայում: Այսինքն՝ գործնականում հնարավոր չէ հարկեր հավաքել այն մարդկանցից, ովքեր շրջանառություն եւ եկամուտներ չունեն: Իհարկե կան, հաստատագրված հարկերի որոշակի տեսակներ եւ այդ հարկերի հավաքագրումն ապահովելու համար է, որ մենք տնտեսական եւ սոցիալական աջակցության ծրագրեր ենք իրականացնում»:
Կարդացեք նաև
Լուսինե ԲՈՒԴԱՂՅԱՆ
