Այսօր Արդարադատության նախարար Ռուստամ Բադասյանից հետաքրքրվեցին՝ եթե մինչեւ հիմա չի պարզվել, թե ինչպես են գաղտնալսվել վարչապետը, ԱԱԾ պետն ու ՀՔԾ պետը, ինչպե՞ս է ապահովվելու մարդկանց զանգերն ու տեղորոշումը վերահսկող ողջ այս գործընթացն առանց խնդիրների:
Բադասյանն ի պատասխան ասաց. «Այս նախագծով նախատեսված տեղեկատվության փոխանցումը տեխնիկապես հնարավոր չի դարձնում որեւէ կերպ խոսակցության բովանդակության հասանելիությունը, սա գաղտնալսման մասին նախագիծ չէ, ավտոմատացված համակարգը վերցնում է կատարված զանգը, վարակակրի եւ խոսացողի հետ տեղակայման վայրի համընկնումը, գեներացնում է տվյալներ, եթե համընկնում է լինում, սկսում են կատարվել գործողություններ՝ համաճարակի դեմ արդյունավետ պայքարելու համար, ի՞նչ կապ ունեն վարչապետի, ԱԱԾ պետի ու ՀՔԾ պետի գաղտնալսումները:
Ռուստամ Բադասյանը լրագրողների հարցերին պատասխանեց կառավարության մամուլի կենտրոնում կազմակերպած ասուլիսում:
Aravot.am-ի հարցին, թե այսօր արդեն սոցիալական ցանցերում մի շարք քաղաքացիներ, այդ թվում եւ իրավաբաններ, հայտարարեցին, որ բոյկոտում են այդ օրենքը եւ շփվելու են միայն այլընտրանքային կապերով՝ Viber, WhatsApp, Signal եւ այլն. հաշվի առնելով, որ ինտերնետ հասանելիության տոկոսը մեր երկրում բարձր է, մտավախություն չկա՞, որ շատ քաղաքացիներ հենց այդպես էլ կվարվեն, հետեւաբար՝ հեռախոսային տվյալների վերահսկողության գործընթացն անարդյունավետ կլինի, Բադասյանը պատասխանեց. «Օրիգինալ մտքեր առաջարկելու փոխարեն, առաջարկում եմ վտանգի տակ չդնել հարազատների եւ քաղաքացիների առողջությունը: Չդիմել նման անիմաստ, անբովանդակ քայլերի: Բոլոր քաղաքացիներին ուղղակի կոչ եմ անում պահպանել սահմանափակման կանոնները, պահպանել սոցիալական հեռավորությունը: Նախագիծը մեկ նպատակ է հետապնդում՝ օգնեք մեզ համաճարակի դեմ պայքարելու հարցում, խանգարելու, խոչընդոտելու եւ սեփական առողջությունը վտանգելու որեւէ իմաստ չկա»:
Կարդացեք նաև
Լուսինե ԲՈՒԴԱՂՅԱՆ
