«Ավտոմատացված համակարգը չի գեներացնի այն տվյալները, երբ տեղակայման վայրն ու զանգը չեն համապատասխանում իրար, դա արդեն ռիսկի գործոն չի լինի: Եթե ես վարակակիր եմ եւ զանգել եմ Գյումրի՝ թեկուզ 10-20 անգամ միեւնույն կոնտակտին, դա ռիսկի գործոն չի»,-այսօր՝ մեկնաբանելով արդեն իսկ Ազգային ժողովի կողմից ընդունված «Էլեկտրոնային հաղորդակցության մասին» օրենքում լրացում կատարելու մասին» օրենքների նախագծերի փաթեթը, ասաց Արդարադատության նախարար Ռուստամ Բադասյանը: Նա կառավարության մամուլի սրահում պատասխանելով լրագրողների հարցերին, նշեց, որ նախագիծը գաղտնալսման եւ քաղաքացիների իրավունքներին անհամաչափ միջամտության մասին չէ, ինչպես որ շահարկվում է: Բադասյանը կրկնեց՝ պետք է լինի զանգի եւ տեղակայման համընկում եւ այդ դեպքում ԱԻՆ-ի աշխատակիցների կողմից կկատարվի զանգ:
Նախարարն ասաց, որ տեխնիկապես որեւէ կերպ հնարավոր չէ քաղաքացիների զանգերը գաղտնալսել. «Նախագծով տեխնիկապես հնարավորություն չի տրվում քաղաքացիների զանգերը գաղտնալսել կամ բովանդակությանը ծանոթանալ՝ կլինեն կարճ հաղորդագրություններ, թե՝ հեռախոսային զանգեր: Այս կարգավորումները միայն, բացառապես, արտակարգ դրության ընթացքում են կիրառելու, այսինքն՝ արտակարգ դրությունից հետո հնարավոր չէ որեւէ նման սահմանափակում շարունակի գործել: Ավելին, սա վերաբերում է միայն համաճարակային հիմքով արտակարգ դրությանը, ցանկացած այլ հիմքով արտակարգ դրության ժամանակ նման միջոցառումներ չեն կարող լինել»:
Բադասյանը հայտնեց, որ բոլոր տվյալները՝ լինեն անձնավորված, թե ապաանձնավորված, ենթակա են ոչնչացման՝ արտակարգ դրության ավարտից անմիջապես հետո կամ՝ մինչեւ այդ:
Լուսինե ԲՈՒԴԱՂՅԱՆ
