Շիրակի մարզպետ Տիգրան Պետրոսյանն աշխատանքային խորհրդակցություն է անցկացրել մարզպետարանի տարբեր ոլորտների պատասխանատուների հետ, որի ժամանակ էլ առաջարկել է պետական բյուջեից Շիրակի մարզպետարանին մարտ ամսին պարգևատրման համար հատկացված 8 միլիոն դրամը ուղղել կորոնավիրուսի դեմ պայքարին։ Մարզպետի առաջարկել է նաև այդ գումարի շրջանակներում ավելացնել ապրիլ ամսվա համար բնակիչներին տրվող սոցիալական աջակցությունը։
Այս մասին տեղեկանում ենք Շիրակի մարզպետարանի ՖԲ էջից:
«Շիրակի մարզպետ Տիգրան Պետրոսյանն աշխատանքային խորհրդակցություն է անցկացրել մարզպետարանի ոլորտային պատասխանատուների մասնակցությամբ, որի ժամանակ քննարկվել են մարզում կորոնավիրուսի դեմ պայքարի միջոցառումների ընթացքը, ձեռնարկված քայլերն ու ծրագրերը, մոտակա աշխատանքների պլանավորման ձևաչափը։
Մարզպետի առաջարկով, 2020 թվականի պետական բյուջեով Շիրակի մարզպետարանի կառավարման ապարատին հատկացված մարտ ամսվա պարգևատրման ամբողջ գումարը՝ 8 մլն դրամ, ուղղվելու է մարզի մի շարք հաստատությունների համար ախտահանիչ և պաշտպանիչ միջոցներ ձեռք բերելու, ինչպես նաև ապրիլ ամսվա սոցիալական աջակցության հոդվածով նախատեսված գումարները համալրելու նպատակին»:
Կարդացեք նաև
Aravot.am-ը Շիրակի մարզպետ Տիգրան Պետրոսյանից հետաքրքրվեց, թե ինքն ունե՞ր պարգևավճար, մարզպետն ասաց՝ իհարկե։
«Մոտեցումը եղել է միասնական․ ողջ աշխատակազմով հրաժարվեցինք մարտ ամսվա պարգևավճարից, մեծ մասը կուղղորդվի Շիրակի մարզի առողջապահական կառույցների համար պաշտպանիչ ու արտահանիչ միջոցներ ձեռք բերելուն, մյուս մասը կուղղորդենք սոցիալական բյուջե», -ասաց մարզպետը։
Մենք Տիգրան Պետրոսյանից նաև հետաքրքվեցինք, թե այս օրերին շա՞տ են սոցիալական աջակցություն խնդրողները, մարզպետն ասաց․ «Էլեկտրոնային տարբերակով են գալիս դիմումները, միանշանակ, հիմա կարիք ունեցողներն ավելի շատ են»։
Նունե ԱՐԵՎՇԱՏՅԱՆ
Լուսանկարը՝ Շիրակի մարզպետարանի ՖԲ էջից
