«Այն լուծումները, որոնք հիմա տրվում են, միտված են մեկուսացման ու կանխարգելման աշխատանքներն ավելի էֆեկտիվ դարձնել»,- ԱԺ-ում արտահերթ նիստում հայտարարեց փոխվարչապետ, ՀՀ պարետ Տիգրան Ավինյանը:
Հիշեցնենք, որ քիչ առաջ ԱԺ-ն արտահերթ նիստով երկրորդ ընթերցմամբ քննարկեց, քվեարկեց ու ընդունեց առավոտյան տապալված աղմկահարույց օրենքի նախագիծը, որը վերաբերում է հեռախոսային տվյալների վերահսկողությանը: Նախագծին կողմ քվեարկեց «Իմ քայլի» 71 պատգամավոր, ընդդիմադիր խմբակցությունները, ինչպես եւ առաջին ընթերցման ժամանակ, չէին մասնակցում:
Տիգրան Ավինյանը մանրամասն բացատրեց, թե ինչի համար է իրենց պետք հեռախոսային տվյալների վերահսկողությունը. «Անձանց տեղորոշման ինֆորմացիան, որը պահպանվում է հեռախոսային օպերատորների մոտ, եւ որն ամբողջական անձնավորված է ու շատ երկար ժամանակի համար, ինչպես նաեւ ունեն հեռախոսազանգերի ամբողջական ցանկը տվյալ հեռախոսի հետ կապված, մեզ տալու են մեկ, բայց շատ կարեւոր տեղեկատվություն՝ տեղորոշել այն անձանց, ովքեր շփվել են վարակակիրների հետ: Երբ որ մեզ համաճարակների վերահսկման եւ կանխարգելման ազգային կենտրոնի տվյալների բազայից տեղեկատվություն է հասնում, որ որեւէ անձ վարակակիր է, համակարգը ավտոմատացված ռեժիմով վերլուծելով տվյալ անձի վերջին 14 օրերի տեղադիրքերը, վերլուծելով վերջին օրերին նրա ունեցած հեռախոսազանգերը եւ այս տվյալները միակցելով իրար՝ տալիս է ամենահավանական ցանկը, ովքեր վարակակրի հետ ունեցել են շփում: Արտակարգ իրավիճակների նախարարության աշխատակիցը, ով նստած է կառավարության 5-րդ հարկում՝ իմ սենյակի հարեւանությամբ, զանգահարելու է տվյալ անձին ու րոպե առաջ, վայրկյան առաջ տեղեկացնի, որ տվյալ անձը շփվել է վարակակրի հետ»:
Ավինյանը նաեւ ասաց, որ ոստիկանության հավելյալ ուժեր պետք է ներգրավեն, որ խստորեն տեղաշարժի սահմանափակմանը հետեւեն: Բայց միայն տեղաշարժի սահմանափակումները կիսամիջոց են, նպատակն է տեխնոլոգիական միջոցներով հնարավորինս վարակի տարածումը կանխարգելել:
Կարդացեք նաև
Հռիփսիմե ՋԵԲԵՋՅԱՆ
