Նախքան կորոնավիրուսի համավարակը մարդկանց կուռքերը ֆուտբոլիստներն էին, դերասանները, երաժիշտները: Այժմ ամեն ինչ փոխվում է, մեր ժամանակների գլխավոր հերոսներն են բժիշկները…Մահացության դեպքերի աճի հետ հերոսներ են դառնում նաև դագաղագործները, գրում է ռուս բլոգեր Իլյա Վարլամովը:
«Սովորական դարձած հրաժեշտով հուղարկավորության արարողություն այժմ ոչ բոլորի համար են իրականացնում…հուղարկավորության կազմակերպիչները փողեր են կորցնում, իսկ մարդիկ զրկվում են իրենց հարազատներին հրաժեշտ տալու հնարավորությունից»:
Բլոգերի խոսքով` կորոնավիրուսով պայմանավորված ամենասարսափելի իրավիճակն Իտալիայում է, որտեղ վարակվածին ծանր վիճակով տեղափոխում են հիվանդանոց, և նրան այլևս ոչ մեկ չի տեսնում: Հարազատները կարանտինի մեջ են լինում, մարդիկ մահանում են միայնության մեջ, իսկ հարազատները նույնիսկ հնարավորություն չեն ունենում հրաժեշտ տալ հանգուցյալին:
«Դագաղագործները փոխարինում են ընտանիքի անդամներին: Միակ բանը, որ նրանք կարող են անել, ավտոմեքենայով դագաղը հարազատների պատուհանների մոտով անցկացնելն է, որպեսզի նրանք հասցնեն աղոթել… Բերգամոյում շատ եկեղեցիներ բառի բուն իմաստով լցված են դագաղներով, քահանան ծիսակարգ է անցկացնում բոլորի համար, որից հետո զինծառայողները դագաղները տեղափոխում են ավելի քիչ ծանրաբեռնված շրջաններ»,-գրում է Վարլամովը` նշելով, որ համանման իրավիճակ է նաև Իսպանիայում:
Կարդացեք նաև
Միացյալ Նահանգներում հուղարկավորություն կազմակերպող ընկերությունների բաժնետոմսերի գինն ընկել է 30%, իսկ մի շարք նահանգներում էլ արգելել են հուղարկավորության սովորական կարգ անցկացնել, կազմակերպվում է առցանց տեսահեռարձակում հարազատների համար: Իռլանդիայում մինչև հիմա թույլ են տալիս հուղարկավորություն կազմակերպել` 70-100 մարդկանց ներկայությամբ, բայց խորհուրդ են տալիս հեռավորություն պահպանել, իսկ օրինակ` Մեծ Բրիտանիայում հուղարկավորությանը կարող է ներկա գտնվել մինչև 10 մարդ:
Բլոգերի խոսքով` Իրանում կորոնավիրուսի բռնկումից հետո բազում նոր գերեզմանոցներ են հայտնվել, այստեղ ևս հուղարկավորությունն իրականացնում են առանց մուսուլմանական ծիսակարգերի: Չինաստանում արգելել են սգո միջոցառումները, կորոնավիրուսի հետևանքով մահացածներին միանգամից դիակիզել են:
Պատրաստեց՝ Վիկտորյա ԱՆԴՐԵԱՍՅԱՆԸ
