Վարչապետ Նիկոլ Փաշինյանն այսօր հայտարարեց, որ եւս 10 օրով սահմանափակումները երկարաձգվելու են: Պարետ Տիգրան Ավինյանից այսօր կառավարության մամուլի սրահում կազմակերպված ասուլիսում լրագրողները հետաքրքրվեցին՝ մինչեւ ե՞րբ են տեւելու այդ սահմանափակումները:
Ավինյանն ասաց՝ այս պահին ունենք 532 հաստատված դեպք, 30-ը՝ առողջացած, երեքը՝ մահվան ելքով: Ապա պարետը բացատրեց սահմանափակումների անհրաժեշտությունը՝ նշելով, որ եթե կառավարությունը որեւէ քայլ չձեռնարկեր, որեւէ սահմանափակում չաներ, մարտի 1-ից հետո, 75-80 օրվա ընթացքում Հայաստանի բնակչության 89 %-ն արդեն կլիներ վարակված. «Միայն Երեւանում կունենայինք 8200 ծանր հոսպիտալացված դեպքեր: Սահմանափակումները նպատակ ունեն վարակի տարածման ինտենսիվությունը նվազեցնել, որ այդ թիվը լինի մեկից քիչ: Դա կնշանակի, որ մեկ հոգի վարակակիրը միջինում կվարակի մեկից քիչ մարդ»:
Ըստ պարետի, եւս տասը օրով սահմանափակումների ժամկետը երկարաձգելը թույլ է տալու ամբողջապես ծավալել կանխարգելման եւ մեկուսացման աշխատանքները, օգնել Համաճարակների կանխարգելման եւ վերահսկման ազգային կենտրոնին՝ արդյունավետորեն հայտնաբերելու այն անձանց, որոնք որ վարակակրի հետ ունեցել են շփումներ եւ այդ անձանց ինքնամեկուսացնել:
«Մեր նպատակն է նաեւ ավելացնել թեսթավորման քանակները եւ այս պրոցեսին համահունչ նաեւ նվազեցնել սահմանափակումները: Այս շաբաթվա սահմանափակումները՝ տեղաշարժի եւ գործունեության տեսակների, ամենացայտուն կերպով տեսանելի էին կիրակի օրը: Եվ տարբեր ցուցանիշներով մենք համոզվել ենք, որ մարդկանց տեղաշարժն էականորեն նվազել է, որը վարակի տարածման կանխարգելման առումով շատ դրական է: Բայց մենք նաեւ հասկանում ենք, որ այս սահմանափակումներն անվերջ չեն կարող լինել եւ գնում ենք այն երկրների օրինակով, որ կարողացել են արդյունավետ եւ տեխնոլոգիապես հագեցված կանխարգելել եւ մեկուսացնել: Այսինքն՝ վարակի շղթաները հայտնաբերել, ջարդել այդ վարակի շղթաները ինչ-որ մի կետում եւ շարունակել ապահովել բնականոն կյանքը: Օրինակ՝ նույն Սինգապուրում դպրոցները բաց են, չկա որեւէ մի կառույց կամ գործունեության տեսակ, որն արգելված է»:
Կարդացեք նաև
Պարետը չբացառեց, որ հետագա տասը օրերի ընթացում մարտավարությունը փոխվի եւ սահմանափակումներն ավելի խստացվեն. «Նաեւ վերահսկողությունը պետք է ավելի արդյունավետ դարձնենք: Ոստիկանության ուժերին միացնելու ենք այլ կառույցներից տարբեր ուժեր, որովհետեւ, իրապես, ծանր աշխատանք է այս վերահսկողությունը»:
Տիգրան Ավինյանի հաշվարկներով, եթե բոլոր փուլերը ինչպես որ կառավարությունը նախատեսում է հաղթահարենք, ապա ապրիլի կեսերից, մայիսի սկզբներն ընկած ժամանակահատվածում ամբողջապես վերադառնալու ենք բնականոն կյանքի:
Լուսինե ԲՈՒԴԱՂՅԱՆ
