«Մեկ ամսից ավելի է՝ քարոզում եմ հանուն ժողովրդավարական Արցախի ապագայի: Պարզ է, որ իմ քվեարկությունն էլ դրա օգտին է»,- այսօր քվեարկությունից հետո, լրագրողների հետ զրույցում ասաց Արցախի խորհրդարանի նախագահ, ԱԺԿ նախագահ, նախագահի թեկնածու Աշոտ Ղուլյանը`բարձր գնահատելով իր եւ իր թիմի հնարավորությունները:
Հիշեցնենք, այսօր Արցախի հանրապետությունում նախագահի եւ ԱԺ ընտրություններ են: Հանրապետության նախագահի ընտրություններին մասնակցում է 14 թեկնածու: Ազգային ժողովի 33 մանդատի համար պայքարում է 10 կուսակցություն և 2 դաշինք, որոնք միասին ունեն պատգամավորի 359 թեկնածու:
Ըստ Աշոտ Ղուլյանի, իրենց անցկացրած քարոզարշավը փաստում է, որ հանրության մեծամասնության մոտ բոլոր այն արժեքները, որոնք ներկայացվել են իրենց կողմից, շատ ճիշտ են ընկալվում, շատ լավ են ընկալվում: «Այն, ինչը մարդիկ հանդիպումների եւ զրույցների ժամանակ են ներկայացնում, պետք է կարողանան նաեւ իբրեւ սկզբունք, պահել ընտրատեղամասերում»,- ասաց Աշոտ Ղուլյանը:
Ընտրություններին, քաղաքացիների մասնակցության ակտիվությունն ըստ բանախոսի, խոսում է այն մասին, որ, ի հեճուկս բոլոր դժվարությունների, Արցախի ժողովուրդը տրամադրված է հերթական ժողովրդական, ազատ ընտրություններում ձեւավորելու իր իշխանությունները. «Հուսով եմ ամեն ինչ կլինի այնպես, որ մեր ժողովուրդը գոհ կմնա ընտրություններից»:
Կարդացեք նաև
Պատասխանելով երկրորդ փուլի հավանականության մասին հարցին, Աշոտ Ղուլյանն ասաց`հավանականությունը 50/50 է, թեեւ նախկինում կարծում էր, որ վերջին օրերին կողմնորոշվելն ավելի հեշտ կլինի. «Բայց կարծում եմ, որ երկրորդ փուլի դեպքում շատ ավելի մեծ խնդիրներ կունենանք, լավ կլինի, որ առաջին փուլով ավարտենք»:
Ինչ վերաբերվում է այն տեսակետին, թե միջազգային դիտորդների բացակայությունն այս ընտրություններին կստվերի ընտրությունների լեգիտիմությունը, Աշոտ Ղուլյանը հակադարձում է`ցանկալի կլիներ, որ միջազգային դիտորդներ մասնակցեին ընտրական այս գործընթացին, բայց դա կապված չէ միայն Արցախի հետ, համաշխարհային առումով տեղաշարժերի խնդիր է. «Իհարկե, կասկածի տակ չի դնում»: Նա վստահ է, որ տեղական դիտորդները կանեն առավելագույնը, որպեսզի ազատ ու թափանցիկ ընտրություններ կայանան:
Նելլի ԳՐԻԳՈՐՅԱՆ
Լուսանկարները՝ Աշոտ Ղուլյանի ֆեյսբուքյան էջից
