«Ադրբեջանը միշտ էլ խախտել է հրադադարի ռեժիմը: Մենք զսպման քաղաքականություն ենք վարելու: Ներսից ապահով Արցախ ունենալը կապահովի սահմանների անվտանգությունը»,-Արցախի ընտրատեղամասերից մեկում քաղաքացիական պարտքը կատարելուց հետո լրագրողների հետ զրույցում անդրադառնալով ՀՀ-ի սահմանին Ադրբեջանի սադրանքին, որի հետեւանքով նաեւ երեխա է վիրավորվել՝ ասաց Արցախի ԱԳ նախարար, Արցախի նախագահի թեկնածու Մասիս Մայիլյանը:
Նրա խոսքով՝ Դուշանբեի հանդիպումից հետո իրավիճակն իսկապես կայուն է եղել բանակի եւ ժողովրդի համար. «Մեր նպատակն է՝ հրադադարի խախտումները վերացնելը»:
Արցախյան հակամարտության լուծման տեսլականին անդրադառնալով՝ Մասիս Մայիլյանն ասաց. «Արցախը պետք է լիարժեք մասնակցի բանակցային գործընթացին՝ Մինսկի խմբի հովանու ներքո: Զուգահեռ պետք է շարունակենք Արցախի միջազգային ճանաչումը: Մեծ հաշվով, հիմա որեւէ բանակցություն չկա, կան խորհրդատվություններ, հանդիպումներ: Մենք հասնելու ենք նրան, որ Արցախը մասնակցի բանակցություններին: Ձեւաչափը խեղված է: Անգամ Ադրբեջանն է ասում, որ դրանք խորհրդատվություններ են: Բանակցային սեղանին փաստաթուղթ չկա, հետեւաբար՝ «մադրիդյան» փաստաթուղթն էլ չկա, որեւէ առաջարկ չկա: Հիմա խորհրդատվություններն ընթանում են կայունության եւ վստահության ամրապնդման ուղղությամբ»:
Ինչ վերաբերում է տեղեկություններին, թե հակամարտող կողմերին առաջարկվել է արցախցիների եւ ադրբեջանցիների համատեղ բնակության գոտի հիմնել, Մայիլյանը շեշտեց՝ նման գաղափար գոյություն չունի. «Դա շինծու հայտարարություն է, գիտենք, թե ում կողմից է դա եւ ինչ նպատակ է հետապնդում: Նման հարց չկա եւ չի լինելու: Եթե լինի, ես դեմ եմ լինելու»:
Կարդացեք նաև
Մասիս Մայիլյանը նաեւ վստահեցրեց, որ բանակցային գործընթացում ՀՀ-ի եւ Արցախի իշխանությունների միջեւ տարաձայնություններ չկան:
Լուիզա ՍՈՒՔԻԱՍՅԱՆ
Լուսանկարը՝ Մասիս Մայիլյանի ֆեյսբուքյան էջից
