«Ես կողմնակից եմ եղել ընտրությունների հետաձգմանը՝ հաշվի առնելով մարդկանց առողջությունը, բայց նման որոշում չկայացվեց: Մնաց կոչ անել հիգիենիկ պարագաներ օգտագործել»,-Արցախի ընտրատեղամասերից մեկում քաղաքացիական պարտքը կատարելուց հետո լրագրողների հետ զրույցում ասաց Արցախի ԱԳ նախարար, Արցախի նախագահի թեկնածու Մասիս Մայիլյանը՝ անդրադառնալով փաստին, որ տեղամասերում կուտակումներ կան:
Հիշեցնենք, որ Արցախում կորոնավիրուսի հաստատված դեպք չկա:
Ինչ վերաբերում է հանգամանքին, որ Արցախի հանրային հեռուստատեսության եթերում բանավեճի չմասնակցեց, Մայիլյանը նշեց՝ այդ ձեւաչափում հնարավոր չէր նախընտրական ծրագիր ներկայացնել. «Ոչ մի բանից չեմ խուսափում, բանավեճերի կողմնակից եմ եղել, իսկ մամուլի համար՝ բաց, միշտ շփման մեջ եմ եղել մարդկանց հետ, այդ թվում՝ ուղիղ եթերներով»:
Թեկնածուն ասաց՝ ընտրախախտումների ազդանշաններ կան՝ կապված այն բանի հետ, որ քվեաթերթիկները նկարում են. «Այլ թեկնածուներ էլ են ասել այդ մասին: Նկարում են, որ ցույց տան իրենց ուղղորդողներին, որ պատվերը կատարված է»:
Կարդացեք նաև
Մայիլյանը նաեւ նշեց, որ իր հաղթելու հնարավորությունները շատ բարձր է գնահատում:
Նա անդրադարձավ նաեւ մամուլի տեղեկությանն այն մասին, որ վիճել է Արցախի ՊԲ նախկին հրամանատար Սամվել Բաբայանի հետ (նրա կուսակցությունը սատարում է Մասիս Մայիլյանին): Մայիլյանը վստահեցրեց, որ նման բան չկա, իրենք համագործակցում են. «Հատկապես հայաստանյան ԶԼՄ-ների մի խումբ կա, որն ուզում է, որ ես ու Սամվել Բաբայանը վիճած լինենք…не дождетесь»:
Լուիզա ՍՈՒՔԻԱՍՅԱՆ
Լուսանկարը՝ Մասիս Մայիլյանի ֆեյսբուքյան էջից
