«Ակտիվություն կա: Մտահոգություն կար, կարող էր պասիվություն նկատվել հանրության կողմից, բայց սա մեր քաղաքացիների բարձր գիտակցության աստիճանի հերթական հիմնավորումն է»,-Արցախի ընտրատեղամասերից մեկում քաղաքացիական պարտքը կատարելուց հետո լրագրողների հետ զրույցում հայտարարեց Արցախի նախագահի թեկնածու, «Ազատ հայրենիք» կուսակցության նախագահ Արայիկ Հարությունյանը:
Նա անդրադարձավ նկատառումներին, որ ընտրությունների պատճառով քաղաքացիները մեծ խմբերով կուտակվում են միեւնույն վայրում. «Ես բժիշկ չեմ, բայց եթե մեր առողջապահական համակարգի պատասխանատուները որոշեին, որ հնարավոր չէ պահպանել սանիտարահիգիենիկ նորմերը, պետք էր հետաձգել: Բայց վստահեցնում եմ, որ այս ամենը հնարավոր է լինելու: Ոչ մեկի չենք ասել, որ տանից դուրս գա: Շնորհակալ ենք բոլորին, որ քաղաքացիական պարտքն են կատարում: Այսօր մեզ ավելի մեծ մարտահրավերներ են սպասվում: Համերաշխություն եմ ցանկանում, որ կարողանանք դիմակայել ոչ միայն համաճարակին, այլեւ սպասվող աղետին՝ տնտեսական աղետին: Այս առումով Արցախում լեգիտիմ իշխանություն պետք է ունենանք, որը ՀՀ իշխանության հետ միասին կարողանալու է իրականացնել կարեւոր առաքելությունը: Շատ ծանր վիճակ է սպասվում աշխարհում: Ոչ թե ճգնաժամ, այլ աղետ է սպասվում, որին պետք է դիմակայենք համախմբված»:
Հիշեցնենք, որ Արցախում կորոնավիրուսի հաստատված դեպք չկա:
Հարցին՝ «որպես թեկնածու ՀՀ իշխանության աջակցությունն ունե՞ք», Հարությունյանը պատասխանեց. «Բոլոր թեկնածուներն էլ ունեն»:
Կարդացեք նաև
Ինչ վերաբերում է նախագահի մեկ այլ թեկնածու Մասիս Մայիլյանի խոսքերին, որ ընտրվելու դեպքում ինքը հայտարարելու է, որ բոլորի նախագահն է, Հարությունյանն ընդգծեց. «Ես վաղուց հայտարարել եմ, որ Արցախում բոլորն իմ համար հարազատներ ու բարեկամներ են»:
Լուիզա ՍՈՒՔԻԱՍՅԱՆ
Լուսանկարը՝ Թաթուլ ՀԱԿՈԲՅԱՆԻ/CivilNet
