Տարածաշրջանային կամ փոքրամասնությունների լեզուների վերաբերյալ Եվրոպական խարտիայի փորձագետների կոմիտեն հայտարարություն է տարածել՝ ընդգծելով COVID19 համավարակի ժամանակ առցանց ուսուցման ապահովման կարևորությունն ազգային փոքրամասնությունների համայնքների աշակերտների համար, ինչպես նաև կորոնավիրուսի վերաբերյալ տեղեկատվության տրամադրումը իրենց մայրենի լեզուներով:
Նշենք, որ Հայաստանը 2002 թվականից միացել է Տարածաշրջանային կամ փոքրամասնությունների լեզուների վերաբերյալ Եվրոպական խարտիային, այստեղ տարածաշրջանային կամ փոքրամասնությունների լեզուներն են` ասորերենը, հունարենը, քրդերենը, ռուսերենը և եզդիերենը։
«Աշխարհի բազում երկրներ, այդ թվում՝ Եվրոպայի Խորհրդի անդամ պետությունները, բախվել են աննախադեպ համավարակի, այսպես կոչված կորոնավիրուսի կամ COVID-19-ի հետ: Մի քանի շաբաթ է, ինչ կառավարությունները ներդնում են միջոցառումների լայն շրջանակ՝ սկսած հիգիենայի կանոններից մինչև մասնակի կամ ամբողջական սահմանափակումներ:
Ողջունելով ձեռնարկած միջոցառումները՝ պետք է նշել, որ ստեղծված իրավիճակի վերաբերյալ տեղեկատվությունը, հրահանգները, ուղեցույցները պարբերաբար չեն հրապարակվում տվյալ երկրում պետական լեզվից բացի այլ լեզուներով: Դա վերաբերում է նաև համապատասխան երկրներում տարածաշրջանային կամ փոքրամասնությունների լեզուներին»,-ասվում է հայտարարության մեջ:
Կարդացեք նաև
Փորձագետների կոմիտեն հորդորում է իշխանություններին չմոռանալ, որ ազգային փոքրամասնություններն իրենց հասարակությունների լիարժեք անդամ են, ուստի պետք է համավարակի վերաբերյալ տեղեկատվությունը լիարժեք հասանելի լինի նաև նրանց:
«Բացի այդ մի շարք երկրներ անցել են առցանց ուսուցման: Շատ դեպքերում ուսուցումը սահմանափակվում է միայն պետական լեզվով է և հաշվի չի առնվում այն աշակերտների կարիքները, որոնք կրթություն են ստանում տարածաշրջանային կամ փոքրամասնությունների լեզուներով: Նման մոտեցումը հակասում է ոչ միայն խարտիայով ստանձնած պարտավորություններին, այլ նաև խտրական վերաբերմունք է»,-ասվում է հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
