ԱԺ-ում այսօր քվեարկության դրվեց կորոնավիրուսի կանխարգելման նպատակով քաղաքացիների մասին տեղեկությունները՝ գտնվելու վայրը, հեռախոսային շփում ունեցած անձանց շրջանակը, բժշկական գաղտնիք համարվող տվյալները մեկ առցանց հարթակում հավաքագրելուն եւ այդ կերպ կոնտակտավորների շրջանակն օպերատիվ կերպով պարզելուն առնչվող օրենսդրական փաթեթը, որը սահմանում է՝ առցանց միասնական հարթակում ֆիքսվում է, թե անձը որ հեռախոսահամարին է զանգել եւ որ հեռախոսահամարից է զանգ ստացել, որտեղ է գտնվել:
Քվեարկությունից առաջ «Իմ քայլը» խմբակցության ղեկավար Լիլիթ Մակունցը շեշտեց. «Նախագիծը հեռախոսազանգերի եւ հաղորդագրությունների բովանդակության հսկողություն չի ենթադրում: Նախագիծն ամբողջությամբ հարցը չի լուծում, եւ աշխարհում չկա այդպիսի մեկ գործիք: Սա պարզապես օգնում է պարետատանը: «Իմ քայլը», լսելով գործընկերների դիտարկումները, առաջարկներ կներկայացնի կառավարությանը՝ հետագայում տվյալներն ամբողջությամբ ոչնչացնելու եւ վերահսկողության լրացուցիչ գործիքներ ունենալու առնչությամբ: Հիմա «կողմ» կքվեարկենք»:
Անկուսակցական պատգամավոր Արման Բաբաջանյանն էլ նշեց, որ ՀՀ մարդու իրավունքների պաշտպանը լուրջ վերապահումներ ունի այս նախագծի վերաբերյալ. «Շատ հարցեր անպատասխան են, ես դեմ եմ քվեարկելու»:
Կարդացեք նաև
Օրինագծի առաջին ընթերցմամբ ընդունմանը «կողմ» քվեարկեց 57, «դեմ»՝ 24 եւ «ձեռնպահ»՝ 1 պատգամավոր:
Կորոնավիրուսի հետեւանքով մահացած անձանց դիահերձումը բացառող օրինագծի առաջին ընթերցմամբ ընդունմանն էլ «կողմ» քվեարկեց 66, «դեմ»՝ 16 եւ «ձեռնպահ»՝ 2 պատգամավոր:
Մեկ այլ օրինագիծ էլ, որը բաժնետերերին հնարավորություն է տալիս առցանց ժողովներ եւ քվեարկություններ կազմակերպել, ընդունվեց միաձայն:
Նշյալ երեք նախագծի երկրորդ ընթերցման քննարկումը եւ քվեարկությունը տեղի կունենան վաղը՝ 11:00-ին:
Լուիզա ՍՈՒՔԻԱՍՅԱՆ
