«Ենթադրենք, մեկը վաղուց ցանկանում էր սպանել մյուսին, որը, պարզվում է, հիվանդ է կորոնավիրուսով: Չարագործը կարող է նրան թունավորել մի թույնով, որն արտաքին նշաններ չունի: Ստացվում է, որ մենք չենք նպաստում հանցագործության բացահայտմանը»,-ԱԺ նիստում այսօր առողջապահության փոխնախարար Անահիտ Ավանեսյանին ասաց խորհրդարանի նախագահ Անահիտ Ավանեսյանը:
Հիշեցնենք՝ ԱԺ-ն առաջին ընթերցմամբ քննարկում էր կորոնավիրուսի հետեւանքով մահացած անձանց դիահերձումը բացառող օրինագիծը:
Անահիտ Ավանեսյանն արձագանքեց, որ նշած դեպքի պարագայում դատաբժշկական փորձաքննություն է ցուցված, հետեւաբար՝ հերձում իրականացվելու է: Փոխնախարարի խոսքով՝ դիահերձում արվում է, երբ.
-մահացածի անձը հայտնի չէ,
Կարդացեք նաև
-ախտորոշումը հայտնի չէ,
-բժշկական անձնակազմի դեմ բողոք կա,
-տեղի է ունեցել սպանություն, ինքնասպանություն,
-առկա է բռնի մահվան կասկած:
Այս բոլոր դեպքերը, ըստ Անահիտ Ավանեսյանի, դատաբժշկական փորձաքննության հիմք են, ուստի հերձում իրականացվելու է. «Եթե թունավորման ախտանշաններ կամ բռնի գործողության նշաններ լինեն, կլինի դատաբժշկական փորձաքննություն: Իսկ եթե նման կասկածներ չկան, հերձում չի արվում»:
«Իմ քայլի» պատգամավոր Սերգեյ Ատոմյանը հետաքրքրվեց՝ կորոնավիրուսի հետեւանքով մահացած անձի հուղարկավորության ժամանակ վարակի տարածման ռիսկ կա՞: Անահիտ Ավանեսյանը պատասխանեց, որ իրավիճակը ենթադրում է հատուկ պաշտպանիչ պարկերի օգտագործում, դիակի հատուկ մշակում եւ դագաղի զմռսում. «Մահացածի դին հարազատներին հանձնվում է զմռսված դագաղով»:
Լուիզա ՍՈՒՔԻԱՍՅԱՆ
