Առողջապահության նախարար Արսեն Թորոսյանը «COVID-19- առերեսվելով համաշխարհային վախին» թեմայով առցանց վեբինարի ընթացքում ներկայացրեց Հայաստանի պայքարը կորոնավիրուսի դեմ։
«Մենք սկսեցինք այս խնդրին ուշադրություն դարձնել հունվարի կեսերից, որովհետև մենք ունեինք շատ առանձնահատուկ իրավիճակ՝ առանց վիզայի ռեժիմը Չինաստանի հետ ուժ ստացավ, երբ բռնկումը սկսվեց Չինաստանում։ Եվ մենք պետք է արագ գործեինք՝ սահմանափակելով վիրուսի հնարավոր մուտքը»,- ասաց նա՝ նշելով, որ Հայաստանը կասեցրել է Չինաստանի հետ առանց վիզայի ռեժիմը, ինչը, ըստ նրա, օգնեց Հայաստանի կառավարությանը ժամանակ շահել՝ պատրաստվելու համար կորոնավիրուսի դեմ պայքարին։ Նախարարի գնահատմամբ՝ Հայաստանի կառավարությունը հաջողեց այդ գործում։
Արսեն Թորոսյանը շեշտեց, որ առողջապահության նախարարության գործողությունները համահունչ են Առողջապահության համաշխարհային կազմակերպության և ՄԱԿ-ի առաջարկություններին։
«Մենք փորձում ենք օգտագործել դեղամիջոցներ և մեթոդները, որոնք ամբողջովին ապացույցների վրա չեն հիմնված, որովհետև մենք շատ քիչ ժամանակ ունենք»,- ասաց նա։ Արսեն Թորոսյանը հավելեց, որ աշխատում են առողջապահության համակարգում առանձին ճյուղ ստեղծելու վրա, որը կզբաղվի միայն կորոնավիրուսի հարցերով։ Եվ մոբիլիզացնում են լքված և ոչ ամբողջությամբ ծանրաբեռնված հիվանդանոցները. «Մենք մոբիլիզացնում ենք ավելի քան 700 մահճակալ միայն կորոնավիրուսի համար, նաև՝ 70-80 ինտենսիվ թերապիայի բաժանմունքի մահճակալներ։ Ինչը կարող է մի փոքր ավելանալ»։
Կարդացեք նաև
Նա նշեց, որ Հայաստանը սարքավորումներ է ձեռք բերում, բայց այստեղ էլ լոգիստիկ խնդիրներ կան, քանի որ Հայաստանից թռիչքներ շատ ուղղություններով չեն կայանում, իսկ ցամաքային տրանսպորտը շատ դանդաղ է։ Արսեն Թորոսյանը հավելեց, որ Հայաստանի կառավարությունը գիտակցում է, որ սա մեկ կամ երկու ամիսների խնդիր չէ, և պետք է պատրաստ լինեն ավելիին։
https://www.facebook.com/discussionpaper/videos/1560444344107451/
Ամի ՉԻՉԱԿՅԱՆ
